Tokio Olimpiadasynda bokstan Qazaqstan quramasynyń beldi ókili Abylaihan Júsipov jeńilip qaldy, dep habarlaidy Olympic.kz.
69 keli salmaq dárejesinde synǵa túsken Abylaihan amerikalyq Djonson Delantemen kezdesip, 1:4 esebimen jeńilis tapty.
Osylaisha, eldiń eń tájiribeli boksshylarynyń biri jarysty júldesiz aiaqtady.
Abylaihan Júsipov - Qaraǵandy oblysynyń týmasy, 24 jasta. Boksshy 2016 jyly 19 jasynda 64 kelige deiingi salmaqta Rio Olimpiadasyna qatysyp, alǵashqy jekpe-jeginde jeńilgen edi. Al 2017 jáne 2019 jyldary álem chempionatynda qola medal ielengen.
Olimpiadanyń 1/8 finalynda Qazaqstan tolyq qurammen óner kórsetedi. Buǵan deiin alǵashqy kezeńde 57 kelige deiingi salmaqta Serik Temirjanov, 63 kelige deiingi salmaqta Zákir Safiýllin men 52 kelige deiingi salmaqta Sáken Bibosynov jeńiske jetken bolatyn.
Aita keteiik, Abylaihan Júsipov jankúierler atap ketken "qazaq salmaǵynda" synǵa túsken. 69 kelige deiingi salmaqta 2004 jyly Baqtiiar Artaev, 2008 jyly Baqyt Sársekbaev, 2012 jyly Serik Sápiev jáne 2016 jyly Daniiar Eleýsinov Olimpiadada altyn medal ielengen.
