QR Prezidenti Qasym-Jomart Toqaevtyń Koreiaǵa memlekettik sapary aiasynda Seýldegi Abai músininiń ashylýynda sóilegen sózi jariialandy, dep habarlaidy "Ult aqparat".
Memleket basshysy Qasym-Jomart Toqaevtyń Koreia Respýblikasyna jasaǵan memlekettik sapary aiasynda qazaq oishyly Abai Qunanbaiulynyń músini ashylǵan bolatyn. Seýlde ornatylǵan biýstiń ashylý saltanaty beinelengen videony Prezidenttiń baspasóz hatshysy Berik Ýáli Facebook-tegi paraqshasynda jariialady.
Jobasy Qazaqstanda daiyndalyp, sulbasy Koreiada qoladan quiylǵan músinniń ashylýynda Qasym-Jomart Toqaev qazaq oishylyna arnalǵan eskertkishtiń ýniversitet aýmaǵyna ornatylýynyń mańyzdy ekenine toqtaldy.
«Abai jurtty ǵylym igerýge, bilimdar bolýǵa úndedi, jańashyldyq pen jasampazdyqty dáriptedi. Abai murasy – bizdiń elimizge ǵana emes, barsha adamzatqa ortaq qundylyq. Abai shyǵarmalary álemniń birqatar tiline aýdaryldy. Sonyń ishinde korei tilinde «Altyn shańyraqta shyrqalǵan án» atty kitaby jaryqqa shyqty. Koreiada uly oishylǵa arnalǵan markalar ázirlendi. Munyń bári eki eldiń rýhani yntymaqtastyǵyn odan ári nyǵaita túseri anyq», - degen Memleket basshysy ekijaqty qarym-qatynasymyzdyń tamyry tereńde jatqanyn atap ótti.
«Kezinde týǵan elinen amalsyz ajyraǵan myńdaǵan káris azamaty qazaqtyń jerinen pana tapty. Búginde olar Qazaqstandy otanym dep sanaidy. Káris baýyrlarymyz egemen elimizdi órkendetýge barynsha úles qosyp kele jatyr. Sonymen birge olar eki memlekettiń arasynda dáneker bolýda. Biyl Qazaqstannyń táýelsizdigine 30 jyl tolady. Osy kezeńde elderimiz senimdi serikteske ainaldy. 2010 jyl Qazaqstannyń Koreiadaǵy jyly dep jariialandy. 2011 jyly Koreianyń Qazaqstandaǵy jyly dep ataldy. Sol arqyly biz barlyq baǵyttaǵy bailanystarymyzdy damyttyq. Ásirese mádeni-rýhani saladaǵy yntymaǵymyzdy nyǵaittyq», - dedi Prezident.
Saltanatty sharada sóilegen sóziniń sońynda Qasym-Jomart Toqaev qazaq oishylynyń músinin Koreia astanasynda ornatýǵa atsalysqan adamdardyń bárine alǵys aitty.
«Osyndai tyǵyz qarym-qatynas bolashaqta da jalǵasyn tabady. Qazaqstannyń jetekshi oqý ornynda korei tili oqytylyp keledi. Koreialyq stýdentter de qazaq tilin oqyp júrgenin jaqsy bilemiz. Bul, árine, kóńil qýantarlyq erekshe jaǵdai. Kóptegen qazaq jastary korei ýinversitetterinde bilim alýda. Biz bilim, ǵylym jáne mádeniet salasyndaǵy yntymaqtastyqty odan ári jalǵastyra beremiz. Bul ózara bailanysty keleshekte de dostyq rýhynda damyta túsýge jol ashady. Barshańyzdy Koreia astanasynda Abai eskertkishiniń ashylýymen quttyqtaimyn. Bul – eki el úshin de aitýly tarihi oqiǵa. Osy mańyzdy sharaǵa atsalysqan azamattarǵa shynaiy rizashylyǵymdy bildiremin. Abai murasy Koreia halqynyń rýhani áleminen óz ornyn tabatynyna kámil senemin», - dep túiindedi Qazaqstan basshysy.
