Qazaqstan Prezidentiniń bir jyl ishinde atqarǵan jumysy týraly jinaq jaryq kórdi, dep habarlaidy "Ult aqparat" Memleket basshysynyń baspasóz hatshysy Berik Ýálidiń Facebook-tegi paraqshasyna silteme jasap.
2020 jyl búkil álem COVID-19 pandemiiasyna qarsy jumyla kúresken jyl retinde tarih jylnamasyna jazyldy. Koronavirýs indeti tek Qazaqstandy ǵana emes, dúniejúzin áleýmettik-ekonomikalyq daǵdarysqa ushyratty. Elimiz osy qaterli derttiń saldary aýyr bolatynyn alǵashqylardyń biri bolyp túsinip, der kezinde tiisti sharalar qabyldady.
Memleket basshysy koronavirýs indetimen kúres kezinde, eń aldymen, halyqtyń densaýlyǵyn qorǵaý, ekonomikanyń turaqtylyǵy men damý qarqynyn saqtaý, bilim berý salalaryna basa mán berdi. Atap aitqanda 4,5 millionnan astam adamǵa 42500 teńge kóleminde qarjylai kómek kórsetildi. 1 millionnan astam azamatqa azyq-túlik pen turmystyq zattar úlestirildi. 2 millionǵa jýyq adamnyń nesie tóleý merzimi keiinge shegerildi. 700 myńnan astam kompaniia men kásipkerlerdiń salyq júktemesi azaityldy. Jalpy Qazaqstan Prezidentiniń tapsyrmasymen qurylǵan Tótenshe jaǵdai jónindegi memlekettik komissiia 500-ge jýyq mańyzdy sheshimderdi iske asyrdy.
Qasym-Jomart Toqaev pandemiia qaýpine qaramastan, óńirlerde qalyptasqan ahýaldy óz kózimen kórip, indetke qarsy kúresip jatqan jurtshylyqpen júzbe-júz kezdesip, oblystardyń áleýmettik-ekonomikalyq damý barysymen tanysý úshin Jambyl, Aqmola, Túrkistan, Qostanai, Soltústik Qazaqstan, Almaty, Shyǵys Qazaqstan, Qaraǵandy oblystaryna jumys saparymen bardy. Ár aimaqtyń ózine tán erekshelikterine bailanysty atqarylyp jatqan jumystarmen tanysyp, aýyl sharýashylyǵy men ónerkásipti órkendetý úshin investitsiia tartý, túitkildi máselelerdi sheshý jóninde tapsyrmalar berdi.
Koronavirýs pandemiiasy Qazaqstannyń halyqaralyq qatynastaryna da aitarlyqtai áser etti. Soǵan qaramastan, josparlanǵan álemdik deńgeidegi jiyndardy onlain rejimde ótkizý formaty qoldanysqa engizildi. Atap aitqanda Qasym-Jomart Kemeluly BUU-nyń 75 jyldyǵyna arnalǵan Joǵary deńgeidegi is-sharaǵa, BUU Bas Assambleiasy 75-sessiiasynyń jalpysaiasi debattaryna, TMD memleketteri basshylary keńesiniń otyrysyna, Shanhai Yntymaqtastyq Uiymyna múshe memleketter basshylary keńesiniń otyrysyna, Túrkitildes memleketterdiń yntymaqtastyǵy keńesiniń tótenshe sammitine, Eýraziialyq ekonomikalyq odaqtyń sammitine, Ujymdyq qaýipsizdik shart uiymynyń sammitine jáne basqa da jiyndarǵa video bailanys rejiminde qatysty. Osy jiyndarda Qazaqstannyń halyqaralyq qaýipsizdikti nyǵaitýǵa, jahandyq jáne óńirlik bailanystardy damytýǵa beiil ekenin aitty.
Jalpy Memleket basshysy byltyrǵy 16 naýryzdaǵy televiziialyq úndeýinen bastap bir jyl ishinde aýqymdy jumys atqardy. Osyǵan bailanysty Prezidenttiń Baspasóz qyzmeti biyl da dástúrli túrde Qasym-Jomart Kemelulynyń óńirlerge jasaǵan jumys saparlarynyń barysynda, túrli jiyndarda sóilegen sózderin, Úndeýleri men Málimdemelerin otandyq jáne sheteldik buqaralyq aqparat quraldary ókilderine bergen suhbattary men ártúrli basylymdarda jariialanǵan maqalalaryn úsh kitapqa toptastyryp shyǵaryp otyr.
Birinshi jáne ekinshi kitapqa Qasym-Jomart Toqaevtyń COVID-19 pandemiiasyn eńserip, elimizdiń ekonomikalyq ósimin qaita qalpyna keltirý maqsatymen qolǵa alǵan bastamalary, halyqtyń ál-aýqatyn jaqsartý úshin memlekettiń aldynda turǵan mindetter jónindegi tushymdy oi-pikirleri, sondai-aq, álemdik mańyzy zor halyqaralyq jiyndarda sóilegen sózderi toptastyrylǵan.
Úshinshi kitapqa Memleket basshysynyń otandyq jáne sheteldik buqaralyq aqparat quraldarynda jariialanǵan maqalalary men suhbattary toptastyrylǵan. Kitapta Qazaqstannyń halyqaralyq qatynastarǵa qatysty ustanymy, Prezidenttiń el ishindegi ózekti máselelerge qatysty oi-tolǵamdary sóz bolady.
QR Prezidentiniń Baspasóz qyzmeti oqyrman qaýymǵa Qasym-Jomart Kemelulynyń bir jylda atqarǵan jumystarynyń jalpy qorytyndysy retinde osy 3 tomdyqty usynyp otyr. Jinaqqa Memleket basshysynyń qatysýymen ótken jiyndardyń fotosýretteri de engen. Kitapta jariialanǵan materialdar jas izdenýshilerge, memlekettik mekemelerde eńbek etip jatqan qyzmetshilerge qundy ári derekti qujat bolmaq.
