Qazaqstan Prezidenti Qasym-Jomart Toqaevtyń atyna Naýryz merekesine orai shet memleketterdiń basshylarynan jáne halyqaralyq uiymdardyń jetekshilerinen quttyqtaý hattar men jedelhattar kelip túsýde, dep habarlaidy Aqorda.
QHR Tóraǵasy Si Tszinpin óziniń quttyqtaý jedelhatynda Qytai men Qazaqstan yntymaqtastyqtyń ártúrli salasynda tabysty nátijelerge qol jetkizgenin jáne bul eki memlekettiń halyqtaryna zor paida ákelgenin jazǵan. Sondai-aq Si Tszinpin kelesi jyly eki el de ózara ornatqan diplomatiialyq qatynastarynyń 30 jyldyǵyn atap ótetinine toqtalyp, qytai-qazaq qatynastaryn jańa deńgeige kóterý maqsatynda strategiialyq sabaqtastyqty odan ári qoldap, tereńdetýdiń mańyzdy ekenin aitqan. «Men qytai-qazaq qatynastaryn damytýǵa basa mán beremin. Sizben birge Qytai men Qazaqstan arasyndaǵy dástúrli dostyqty nyǵaityp, eki elmen onyń halyqtarynyń igiligi jolyndaǵy ózara tiimdi yntymaqtastyqty tereńdetý úshin kúsh jumyldyrýǵa daiynmyn», – delingen QHR Tóraǵasynyń jedelhatynda.
Ózbekstan Prezidenti Shavkat Mirziioev quttyqtaý hatynda eki el aldaǵy ýaqytta Ózbekstan men Qazaqstan arasyndaǵy turaqty damyp kele jatqan ózara strategiialyq seriktestikti keńeite alatynyna jáne dostas eki halyqqa ortaq múddeni kózdeitin óte jaqsy nátijelerge qol jetkizetinine senim bildirgen.
Qyrǵyzstan Prezidenti Sadyr Japarov Qazaqstan men Qyrǵyzstan arasyndaǵy baýyrlastyq qatynastar men ózara tiimdi yntymaqtastyqtyń tatý kórshilik, strategiialyq seriktestik pen odaqtastyq negizinde eki halyqtyń múddelerin kózdei otyryp, odan ári nyǵaiatyny jáne damityny jóninde jazǵan.
Tájikstan Prezidenti Emomali Rahmon óz quttyqtaýynda eki memleket arasyndaǵy ózara tiimdi yntymaqtastyqqa baǵyttalǵan qarym-qatynastar qasterli Naýryzdyń máńgilik dástúri negizinde qaryshtap damyp, keńeiip, jańa mán-mazmunmen tereńdei beretinine senim bildirgen.
Túrikmenstan Prezidenti Gýrbangýly Berdimuhamedov jedelhatynda Qasym-Jomart Toqaevqa jáne baýyrlas Qazaqstan halqyna baqyt, shattyq jáne jańa tabys tilegen.
Ázerbaijan Prezidenti Ilham Álievtiń joldaǵan quttyqtaý hatynda Ázerbaijan men Qazaqstan arasyndaǵy qarym-qatynastar Naýryz qundylyqtaryn óte qatty qasterleitin halyqtarymyzdyń erik-jigeriniń arqasynda keńeiip, nyǵaia beredi dep senemin delingen.
Armeniia Prezidenti Armen Sarkisian berik dostyq pen ózara túsinistikke negizdelgen Armeniia men Qazaqstannyń jan-jaqty qatynastary dáiekti túrde odan ári dami beretinine senim bildirgen.
Iran Prezidenti Hasan Rýhani óziniń jedelhatynda Naýryz eki memlekettiń halyqtary úshin jańa múmkindikterge jol ashyp, álemniń barlyq eline qýanysh, igilik, tynyshtyq ákeledi dep úmittenetinin aitqan.
Izrail Prezidenti Reýven Rivlinniń jedelhatynda Naýryz ben Pasha merekelerin toilaý siiaqty babalarymyzdyń ejelgi dástúrleri eki eldi jaqyndastyrady jáne ekijaqty qarym-qatynastardy nyǵaitýdyń berik negizi bolady dep jazylǵan.
Aýǵanstan Prezidenti Ashraf Ǵani Naýryz merekesimen quttyqtai otyryp, dostyq qatynastardy, birlik pen ekonomikalyq ósimdi qoldaýǵa baǵyttalǵan iri aimaqtyq baǵdarlamalar men jobalar aiasyndaǵy yntymaqtastyqty odan ári damytýǵa nietti ekenin naqtylaǵan.
Palestina Prezidenti Mahmýd Abbas Qasym-Jomart Toqaevqa zor densaýlyq, baqyt tilep, baýyrlas Qazaqstan halqynyń berekesi artyp, ósip-órkendei berýine niettestik bildirgen.
Shanhai yntymaqtastyq uiymynyń Bas hatshysy Vladimir Norovtyńjedelhatynda kún men tún teńeletin kóktem merekesiniń adam men tabiǵat arasyndaǵy ózara úilesimge yqpal etip, dostyq pen yntymaqtastyqtyń altyn kópiri bolatyny, sondai-aq, mádenietter men órkenietter dialogyn baiytyp, damytatyny, qaýipsiz ári gúldengen bolashaq qalyptastyrýǵa septigin tigizetini, onyń «Shanhai rýhy» qaǵidattaryna tolyq sai keletini aitylǵan.
Ujymdyq qaýipsizdik shart uiymynyń Bas hatshysy Stanislav Zas Qazaqstannyń UQShU aiasyndaǵy odaqtastyq is-qimyldar mehanizmin nyǵaitýǵa, Ujymdyq qaýipsizdik shart uiymyna múshe memleketterdiń halyqaralyq jáne óńirlik alańdardaǵy kúsh-jigerin úilestirýge qosqan eleýli úlesin atap ótken.
TMD Dinaralyq keńesiniń Teń tóraǵasy Kavkaz musylmandary basqarmasynyń Tóraǵasy Sheih-ýl-islam Allahshúkir Pasha-Zadeniń jedelhatynda Naýryz merekesi Alla Taǵalanyń bizge bergen nyǵmeti jáne tabiǵat pen tirshiliktiń qaita túlep, kóktemgi kún men túnniń teńeletin qýanyshty sáti ekeni aitylǵan. Sonymen qatar ol árbir otbasyna beibitshilik, qut-bereke tilep, barsha Qazaqstan halqynyń ósip-órkendei berýine niettestik bildirgen.
