© Sputnik / Vladislav Vodnev
Tuńǵysh prezident Nursultan Nazarbaevtyń burynǵy keńesshisi Ermuhamet Ertisbaev qańtar oqiǵalary kezinde shabýyldaýshylar birneshe maqsatty kózdegenin málimdedi. Solardyń biri - Toqaevty qorqytý.
Ol prezident Qazaqstanǵa shabýyl jasaǵan 20 myń sodyr týraly aqparatty qaidan alǵanyna qatysty óz oiyn bólisti, dep habarlaidy Sputnik Qazaqstan.
"Olar "qazir biz ony qorqytsaq, qashyp ketedi" dep oilady. Prezidentke qatty qysym jasaldy. Toqaev qoldanǵan – 20 myń terrorist degen aqparatty UQK-niń burynǵy basshylyǵy bergen. Prezidentke bergen aqparattar arasynda "Aqordaǵa shabýyl jasalady", "elordada birneshe myń sodyr júr" degenderi de bar. Toqaev aqparat vakýýmynda boldy. Kúsh qurylymdary ony satyp ketti", - dedi Ertisbaev jýrnalist Gúlnar Bajkenovaǵa bergen suhbatynda.
Saiasattanýshynyń aitýynsha, qańtardaǵy oqiǵalar kezinde Toqaevty qoldaǵandardyń biri ishki ister ministri Erlan Turǵymbaev boldy. Nátijesinde ol óz qyzmetin saqtap qaldy.
"Degenmen, osy jaǵdai kezinde UQK, IIM, arnaiy qyzmetter, Ishki ásker jáne t. b. qaida bolýǵa tiis edi? Olar adamdarmen birge alańda bolyp, jumysyn jalǵastyrýy kerek edi. Al Ulttyq qaýipsizdik komiteti tolyqtai shette qalýdy uiǵardy", - dedi Ertisbaev.
Biyl qańtar aiyndaǵy oqiǵalar barysynda prezident Qasym-Jomart Toqaev shabýyl jasaǵan banditter men terrorister jaqsy oqytylyp, uiymdastyrylǵanyn málimdedi.
Prezident Almatyda lańkestik shabýyldardyń kem degende alty tolqyny bolǵanyn, al sodyrlardyń jalpy sany 20 myńǵa jýyq ekenin aitqan edi.
