Foto: Akorda.kz
Memleket basshysy Joǵarǵy Sot tóraǵasy Aslambek Merǵalievti qabyldady, - dep habarlaidy "Ult aqparat" Aqordanyń baspasóz qyzmetine silteme jasap.
Prezidentke zań ústemdigin qamtamasyz etýge jáne sot tóreliginiń sapasyn arttyrýǵa baǵyttalǵan sot reformasynyń júzege asyrylý barysy týraly málimet berildi.
Joǵarǵy Sot tóraǵasy reforma jónindegi usynystardyń shuǵyl sharalar, zańnamalyq bastamalar jáne uzaq merzimdi mindetter sekildi úsh topqa bólinetinin aitty.
Shuǵyl sharalar aiasynda mindetti túrde offlain ótkizilýi tiis protsester úshin sot zaldaryn ashý, sondai-aq, Joǵarǵy Sottyń normativtik qaýlylaryn jańartý máseleleri josparlanǵan.
Aslambek Merǵalievtiń aitýynsha, isti sotqa deiingi qaraý satysyna tiimdi sot baqylaýyn engizý, memlekettik satyp alý, salyq salý jáne jeke sot oryndaýshylarynyń qyzmeti salalarynda ákimshilik isterdiń qaralý merzimin qysqartý máseleleri zańnamalyq bastamalarǵa jatady.
Uzaq merzimdi jumys tártibinde keshendi zańnamalyq jáne uiymdastyrý sharalaryn ázirleý qarastyrylǵan. Qazir Parlament qaraýynda eki zań jobasy jatyr. Olar sot tóraǵalaryn sailaý arqyly tańdaý tártibin engizýge, kúshtik qurylymdardyń sýdialarǵa qysym jasaý joldaryn joiýǵa, Joǵarǵy Sot keńesiniń quzyretin kúsheitýge jáne iývenaldi sottardyń qaraýyna jatatyn isterdiń aiasyn keńeitýge baǵyttalǵan.
Budan bólek, qylmystyq protseste taraptardyń jaryspalylyǵy qaǵidatyn qamtamasyz etýge jáne zańdy óreskel buzǵany úshin sýdialardy jaýapkershilikke tartý mehanizmderine qatysty usynystar ázirlenip jatyr.
Kezdesý sońynda Memleket basshysy sot júiesin odan ári jetildirý sharalaryn sapaly júzege asyrý qajet ekenine nazar aýdardy.
