Prezident Qasym-Jomart Toqaev Joǵarǵy sot tóraǵasy Jaqyp Asanovty qabyldady, - dep habarlaidy "Ult aqparat" Aqorda baspasóz qyzmetine silteme jasap.
Qasym-Jomart Toqaevqa sot júiesiniń qazirgi damý barysy týraly baiandaldy.
Jaqyp Asanov Memleket basshysyna azamattyq daýlardy sotqa jetkizbei sheshý máselesi jóninde aityp, sońǵy 3 jylda Joǵarǵy sottyń osy baǵytta júzege asyrǵan jobalary jaily aitty. Onyń aitýynsha, buryn isterdiń tek 2-3 paiyzy ǵana tatýlasýmen aiaqtalsa, qazir bul kórsetkish 37 paiyzǵa jetken.
Joǵarǵy sot tóraǵasynyń derekterine sáikes 2018 jylǵa deiin aýyr jáne asa aýyr qylmystar boiynsha bir jylda orta eseppen 23 adam aqtalsa, sońǵy 4 jylda 160-tan astam azamat kinásiz dep tanylǵan. Iaǵni, kórsetkish 7 esege artqan.
Prezidentke memlekettik basqarý júiesindegi ákimshilik iýstitsiia týraly aityldy. Jaqyp Asanovtyń aitýynsha, byltyrǵy 1 shildege deiin azamattar men kásipkerler qaralǵan isterdiń 85 paiyzy boiynsha memlekettik organdardan jeńiletin. Qazirgi tańda isterdiń 55 paiyzy kásipkerler men azamattardyń paidasyna sheshiledi.
Sonymen qatar kezdesýde sot kadrlarynyń sapasyn jaqsartý, azamattardyń sotta qorǵalýyn kúsheitý, sot isin júrgizýdi ońtailandyrý jáne basqa da mindetter týraly aityldy.
