Memleket basshysy Jetisý oblysynyń ákimi Beibit Isabaevty qabyldady, dep habarlaidy "Ult aqparat" Aqordanyń resmi saityna silteme jasap.
Qasym-Jomart Toqaevqa Jetisý oblysynyń qazirgi áleýmettik-ekonomikalyq jaǵdaiy men damý perspektivalary týraly baiandaldy.
Beibit Isabaevtyń aitýynsha, aýyl sharýashylyǵy men óńdeý sektoryn damytýǵa basa mán beriledi. Sondai-aq óńdeý ónerkásibi, mineraldy shikizatty óndirý jáne óńdeý salasynda quny 730,3 milliard teńge bolatyn 24 jobany júzege asyrý josparlanyp otyr. Osy rette 3440 jumys orny ashylady.
Oblys ákimi Prezidentke óńir ekonomikasyn damytý úshin týrizm salasynyń mol áleýeti bar ekenin aitty. Búginde Alakól kóliniń jaǵalaýyndaǵy infraqurylymdardy damytýǵa, Balqash kóli baǵytyndaǵy jol qurylysyna qatysty jumystar júrgizilip jatyr.
Prezident oblys turǵyndarynyń ál-aýqatyn arttyrý mańyzdy ekenine nazar aýdardy. Osyǵan bailanysty Memleket basshysy óńirdegi sýarmaly alqaptardy ulǵaitýǵa baǵyttalǵan irrigatsiia júielerin jańartý, qoljetimdi baspana qurylysynyń kólemin arttyrý, joldardy jóndeý, oblystaǵy eldi mekenderdi gazben qamtý, ónerkásipti, shaǵyn jáne orta biznesti damytý, pedagogtar men dárigerlerdiń tapshylyǵyn joiý siiaqty birqatar ózekti máseleni sheshý qajet ekenin aitty.
Kezdesý sońynda Qasym-Jomart Toqaev Beibit Isabaevqa azamattardyń túitkildi problemalaryn sheshý jáne Jetisý oblysyn áleýmettik-ekonomikalyq turǵydan odan ári damytý úshin tiimdi sharalar qabyldaýdy tapsyrdy.
