Jer qoinaýyna qoljetimdilik máselesin tynysh kabinetterde sheshý áreketi zańnan tys áreket bolyp sanalýy kerek. Prezident Qasym-Jomart Toqaev Qazaqstan halqyna kezekti Joldaýynda osyndai pikir bildirdi, dep habarlaidy QazAqparat.
«Ásirese geologiialyq barlaý jáne jer qoinaýyn keshendi zertteý salasyna serpin kerek. Ult jospary aiasyndaǵy Geologiialyq aqparattardyń ashyq bazasyn qurý reformasy logikalyq túiinine jetkizilýi tiis. Ol bazanyń investorlarǵa qoljetimdiligi qamtamasyz etilsin. Jer qoinaýy – bul ulttyq igilik. Oǵan qoljetimdilik máselesin kýlýarlyq talqylaýlar arqyly tynysh kabinetterde sheshý zańnan tys áreketke jatqyzylýy kerek. Tiisti organdar osy másele boiynsha baqylaýdy qamtamasyz etedi», - dedi Prezident óz Joldaýynda.
Sonymen birge, ol budan bylai memleket bankirlerge kómektespeitinin eskertti.
«Strestik aktivterdi azaitý jónindegi jumystardyń mańyzy zor. Biz sheshim qabyldadyq: memleket bankirlerge kómektespeýi kerek. Onymen birge buǵattalǵan aktivterdi ekonomikalyq ainalymǵa qaitarý mańyzdy. Biraq ol tek qana naryqtyq negizde júrýi kerek. Ol úshin zańnamalyq baza qajet. Úkimet Qarjy naryǵyn retteý jáne damytý agenttigimen birge jyl aiaǵyna deiin Parlamentke zań jobasyn usynýy tiis», - dedi Memleket basshysy.
