Jastarymyzdyń jan-jaqty damýyna jaǵdai jasaý – meniń Prezident retindegi basty mindetterimniń biri. Bul týraly búgin Jastar jylynyń jabylý jáne Volenter jylynyń ashylý saltanatynda Memleket basshysy Qasym-Jomart Toqaev aitty, dep habarlaidy QazAqparat tilshisi.
«Búgin ulan baitaq elimizdiń túpkir-túpkirinen kelgen jastar elorda tórinde, Nur-Sultan qalasynda, halqymyzdyń qutty mekeninde bas qosyp otyr. Sizdermen Táýelsizdik kúni qarsańyzda júzdesip otyrmyz. Biz úshin budan asqan qasterli ári mańyzdy mereke joq. Barshańyzdy quttyqtaimyn. Táýelsizdigimizdi nyǵaityp, elimizdi odan ary órkendetý qazirgi urpaqtyń qasietti boryshy. Sondyqtan biz sizderge zor úmit artamyz. Memleketimizdiń keleshegi – ózderińiz. Jańa ǵana jastardyń bir top ókili túrli ózekti taqyryptarda jaqsy sóz sóiledi. Utymdy pikirler aitty. Men barsha jastardy maqtan tutamyn», - dedi Memleket basshysy.
Qazaqstan Prezidenti biylǵy jyldyń mán-mańyzy erekshe bolǵanyn, Elbasy Nursultan Nazarbaevtyń bastamasymen barsha el bolyp, jastar jylyn ótkizgenimizdi aitty.
«Bárimiz bilimdi ári básekege qabiletti urpaq tárbieleý isine airyqsha mán berip otyrmyz. Jalpy, elimizdegi bastamalardyń barlyǵy jas býynnyń jarqyn bolashaǵy úshin qolǵa alyndy. Jastarymyzdyń jan-jaqty damýyna jaǵdai jasaý – meniń Prezident retindegi basty mindetterimniń biri. Sondyqtan osy másele árdaiym meniń nazarymda bolady. Búgingi jastar – elimizdi erteńi, ultymyzdyń bolashaǵy, memleketimizdiń mártebesi», - dedi Qasym-Jomart Toqaev.
