Foto: Akorda.kz
Tamara Dúisenova Premer-ministrdiń orynbasary – Eńbek jáne halyqty áleýmettik qorǵaý ministri bolyp taǵaiyndaldy, - dep habarlaidy "Ult aqparat" Aqorda saityna silteme jasap.
"Tamara Bosymbekqyzy Dúisenova Qazaqstan Respýblikasy Premer-Ministriniń orynbasary – Eńbek jáne halyqty áleýmettik qorǵaý ministri bolyp taǵaiyndalsyn, ol burynǵy atqarǵan laýazymynan bosatylsyn", - delingen Jarlyq mátininde.
Eske salaiyq, buǵan deiin Altai Kólginov premer-ministrdiń orynbasary qyzmetinen bosatylǵan bolatyn.
Aita keteiik, Tamara Bosymbekqyzy 1965 jyly 11 qańtarda Ońtústik Qazaqstan oblysynda týǵan.
1987 jyly Tashkent halyq sharýashylyǵy institýtyn bitirgen, mamandyǵy – injener-ekonomist, ekonomika ǵylymdarynyń kandidaty.
Eńbek jolyn 1988 jyly institýtty aiaqtaǵannan keiin Ońtústik Qazaqstan oblysy Saryaǵash aýdanyndaǵy orta mekteptiń informatika pániniń muǵalimi qyzmetinen bastady.
1988-1992 jyldary Ózbek SSR-niń Memlekettik josparlaý komitetiniń Ekonomika ǵylymi zertteý institýtynyń ekonomisi bolyp jumys istedi.
1992-1993 jyldary – Ońtústik Qazaqstan oblysy Saryaǵash aýdandyq ákimshiliginiń aǵa ekonomisi; 1993-1994 jyldary – «Perizat-holding» kompaniiasynyń bólim basshysy; 1994-1997 jyldary – Saryaǵash aýdany ákiminiń keńesshisi, orynbasary, birinshi orynbasary; 1997-1999 jyldary – Shymkent qalasy ákiminiń birinshi orynbasary; 1999-2002 jyldary – Ońtústik Qazaqstan oblysy ákiminiń orynbasary; 2002-2006 jyldary – Qazaqstan Respýblikasy Eńbek jáne halyqty áleýmettik qorǵaý ministrliginiń vitse - ministri; 2006 - 2008 jyldary - Ońtústik Qazaqstan oblysy ákiminiń orynbasary; 2008 – 2013 jyldary Qazaqstan Respýblikasy Eńbek jáne halyqty áleýmettik qorǵaý ministrliginiń jaýapty hatshysy; Eńbek jáne halyqty áleýmettik qorǵaý vitse-ministri (02.2013-06.2013); Eńbek jáne halyqty áleýmettik qorǵaý ministri (2013-2014); QR Densaýlyq saqtaý jáne áleýmettik damý ministri (2014-2017); Eńbek jáne halyqty áleýmettik qorǵaý ministri (2017-2018); «Nur Otan» pariiasynyń hatshysy (2018-2019). «Eńbek resýrstaryn damytý ortalyǵy» AQ jetekshisi (2019-2020).
2020 jyldyń mamyrynda Prezident kómekshisi-Prezident Ákimshiliginiń Ótinishterdi qaraýdy baqylaý bóliminiń meńgerýshisi bolyp taǵaiyndalǵan.
2022 jyly 11 sáýirden beri Eńbek jáne halyqty áleýmettik qorǵaý ministri qyzmetin atqaryp keldi.
«Qurmet» ordenimen, «Qazaqstan Respýblikasynyń táýelsizdigine 10 jyl» (2001), «Qazaqstan Konstitýtsiiasyna 10 jyl» (2005) medaldarymen marapattalǵan.
