Memleket basshysy Qasym-Jomart Toqaev Ulytaý oblysynyń damý perspektivalarymen tanysty, - dep habarlaidy "Ult aqparat" Aqorda saityna silteme jasap.
Qasym-Jomart Toqaev jaqynda qurylǵan Ulytaý oblysynyń ortalyǵy Jezqazǵan qalasyna bardy.
Ulytaý oblysynyń ákimi Berik Ábdiǵaliuly Prezidentke oblystyń ákimshilik ortalyǵy Jezqazǵan qalasynyń jáne óńirdiń qazirgi jaǵdaiy men damý perspektivalary týraly baiandady.
Ekologiialyq ahýaldyń nasharlaýy, aimaq arqyly ótetin respýblikalyq joldardyń tozýy, ekonomikanyń ártaraptandyrylmaýy nemese iri kásiporynǵa táýeldilik, injenerlik kommýnikatsiia júieleriniń eskirýi jáne áleýmettik sala óńirdiń negizgi problemalary retinde atap ótildi.
Ulytaý oblysynyń ákimi respýblikalyq dárejedegi joldardyń tozýy óńir ekonomikasynyń damýyn tejep turǵan basty faktor ekenine toqtalyp, osyǵan bailanysty tranzittik kólik qatynastarynyń azaiǵanyn, sáikesinshe baǵanyń qymbattaǵanyn, iskerlik belsendilik pen biznestiń kenjelep qalǵanyn aitty.
Berik Ábdiǵali ekonomikany ártaraptandyrý isin jedeldetý úshin arnaiy ekonomikalyq aimaq qurý qajet ekenin atap ótti. Sonymen qatar Qasym-Jomart Toqaevtyń tapsyrmasyna sáikes Úitas – Aidos sý qubyrynyń qurylysy 2025 jyly aiaqtalatynyn, al Jezqazǵan qalasyna Esqula qubyrymen sý tartý 2023 jyly bastalatynyn jetkizdi.
Óńir ákiminiń derekterine sáikes oblys ortalyǵyndaǵy turǵyn úilerdiń 33 paiyzy eskirgen. Qazir turǵyn úilerdi jańartý baǵdarlamasy júzege asyryla bastaǵan. Sonymen qatar 2022 – 2023 jyldary qalanyń jańa aýdanynda kóp qabatty 20 turǵyn úi salý josparlanǵan.
Berik Ábdiǵali Qasym-Jomart Toqaevqa áleýmettik saladaǵy máselelerdi sheshý úshin memlekettik ýniversitet, qosymsha bilim berý ortalyǵyn, sapaly mektepter, dene shynyqtyrý-saýyqtyrý sport keshenderin jáne filarmoniia zalyn salý qajet ekenin jetkizdi.
Jezqazǵan qalasynyń jáne Ulytaý oblysynyń jaǵdaiymen tanysqan Prezident óńirdi damytý jónindegi usynystardy qoldaitynyn aitty. Memleket basshysy, eń aldymen, jergilikti turǵyndardyń turmys sapasyn jaqsartý qajet ekenin eskertti. Qasym-Jomart Toqaev Úkimet pen oblys ákimdigine jol máselesine, ekologiiaǵa, bilim salasyn damytýǵa kúsh salýdy tapsyrdy.
– Qala barlyq jaǵynan tartymdy bolýy kerek. Jumys óte kóp. Men Jezqazǵannyń, oblystyń eń kórikti óńir bolatynyna senemin, – dedi Prezident.
Budan keiin «Qazaqmys holdingi» JShS Direktorlar keńesiniń tóraǵasy Edýard Ogai kásiporyndy jáne óńirdi damytý jóninde baiandama jasady. Kompaniia Jezqazǵan, Sátbaev qalalarynyń infraqurylymyn damytýǵa úles qospaq. Biznestiń áleýmettik jaýapkershiligi turǵysynan «Qazaqmys» biyl 25,4 milliard teńge bólgen. Bul byltyrǵyǵa qaraǵanda eki ese kóp. Memleket basshysy aldaǵy aýqymdy jumystar úshin bul qarjynyń jetkiliksiz bolatynyn aityp, bólinetin qarjyny kóbeitý týraly usynysyn jetkizdi.
– Men myna máselege toqtalǵym keledi. Oblys ákiminiń óńirdi damytý týraly josparyn tyńdadyńyzdar. Áleýmettik máseleler sheshimin tabýǵa tiis. «Qazaqmys» kompaniiasyn osy iske belsendi túrde atsalysýǵa shaqyramyn. 25,4 milliard teńge mundai aýqymdy jumystar úshin jetkiliksiz bolýy múmkin. Qarjyny ulǵaitý múmkindigin qarastyrǵan jón. Áleýmettik nysandardyń qurylysyna kómektesý qajet. Sport ǵimarattary kerek. Jergilikti halyq úlken úmit artyp otyr. Osy turǵydan alǵanda qaladaǵy jaǵdaidy jaqsartýymyz kerek. Árine, mádeni nysandarǵa da erekshe kóńil bólinýi qajet, – dedi Qasym-Jomart Toqaev.
Kompaniia basshylyǵy densaýlyq saqtaý, bilim berý, sport salalaryna erekshe kóńil bólinetinin baiandady. Atap aitqanda, kelesi jyly Jezqazǵanda balalarǵa arnalǵan sport akademiiasy men 200 balaǵa arnalǵan internat salý máselesi de qarastyrylǵan.
Qasym-Jomart Toqaev sport nysanyn salǵanda ártúrli sportty qamtityn kópfýnktsiialdy etip salý qajet ekenin atap ótti.
Sonymen qatar kompaniia jańa standarttarǵa sáikes turǵyn úiler qurylysyn qolǵa alýdy josparlap otyr.
