Memleket basshysy Otarbiopfarm immýnobiologiialyq preparattar shyǵaratyn biofarmatsevtika zaýytyna bardy, - dep habarlaidy "Ult aqparat" Aqorda saityna silteme jasap.
Qasym-Jomart Toqaevtyń Jambyl oblysyna jumys sapary Qordai aýdanyndaǵy Biologiialyq qaýipsizdik problemalary ǵylymi-zertteý institýtyna qarasty QazVac vaktsinasyn shyǵaratyn biofarmatsevtika zaýytynyń qyzmetimen tanysýdan bastaldy.
Prezidentke vaktsina óndirisiniń tehnologiialyq jelisi, zerthanalyq jabdyqtar men mobildi reaktorlar kórsetildi.
Institýttyń bas direktory Kúnsulý Zakariia Biologiialyq qaýipsizdik problemalary ǵylymi-zertteý institýtyn odan ári damytý jospary týraly baiandady.
Zaýyt óndiristik tájiribe boiynsha halyqaralyq standarttarǵa (GMP) sai keletin immýnobiologiialyq dári-dármekter, onyń ishinde koronavirýs indetine qarsy vaktsina, tumaýǵa, týberkýlezge, brýtsellezge, nodýliarly dermatitke jáne basqa da juqpaly aýrýlarǵa qarsy vaktsinalar shyǵaratyn bolady.
Jylyna biofarmatsevtika preparattarynyń 30-dan 60 millionǵa deiin dozasyn ázirleý josparlanyp otyr. Jobanyń jalpy quny - 15,6 milliard teńge.
Qasym-Jomart Toqaevqa 16 qyrkúiek kúni 100 myń doza kóleminde vaktsina quiý óndirisi iske qosylǵany týraly málimet berildi.
TMD elderi arasynda Qazaqstan men Resei ǵana COVID-19 indetine qarsy vaktsina óndirisin jolǵa qoiǵan.
Prezident zaýyt qyzmetkerlerimen áńgimelesý barysynda jobanyń mańyzdylyǵyn atap ótip, otandyq vaktsinanyń koronavirýs indetine qarsy kúreske jáne halyqtyń densaýlyǵyn kúsheitýge zor úles qosatynyna senim bildirdi.
"Barshańyzdy quttyqtaimyn. Shyn máninde, bul - úlken jetistik. Elimiz úshin qajetti óndiris. Negizgi jumys oryndaldy. Bári durys. Kelesi jyly osy jumysty jalǵastyramyz. Bul vaktsinany Birikken Arab Ámirlikterine jáne basqa da musylman elderine jiberemiz. Vaktsinamyz dúnie júzinde moiyndalyp jatyr. Sondyqtan barshańyzdy quttyqtaimyn! Rizashylyǵymdy bildiremin. Bul - óte kúrdeli protsess, óndiris. Shyn máninde, dúniejúzinde, shetelde mundai óndiris jasaý úshin úsh-tórt jyl ketedi. Biz toǵyz aidyń ishinde jumysty oryndadyq. Sondyqtan eńbekterińiz memleket tarapynan joǵary baǵalanady", - dedi Qasym-Jomart Toqaev.
