Memleket basshysy Ulttyq qoǵamdyq senim keńesiniń múshelerimen birqatar kezdesýler ótkizdi, dep habarlaidy "Ult aqparat" Aqordaǵa silteme jasap.
Belgili qoǵam qairatkeri, pýblitsist Seidahmet Quttyqadammen áńgimelesý barysynda Qazaqstan Respýblikasy Prezidentiniń janyndaǵy Ulttyq qoǵamdyq senim keńesi jumysynyń ózekti aspektileri, atalǵan dialog alańynyń elimizdiń áleýmettik-saiasi ómirindegi róli talqylandy.
Sonymen qatar, kezdesýde qazirgi ishki saiasi ahýal jáne Ortalyq Aziiadaǵy óńirlik úderister jóninde sóz boldy.
Qazaqstannyń Azamattyq aliansynyń prezidenti Asylbek Qojahmetovpen ótken kezdesýde azamattyq qoǵamdy damytý, memlekettik organdar janyndaǵy qoǵamdyq keńesterdiń rólin arttyrý máseleleri talqylandy.
Memleket basshysy azamattyq sektordy nyǵaitýdyń jáne onyń áleýetin ártúrli salada paidalanýdyń mańyzdylyǵyn atap ótti.
Sonymen qatar, bilim jáne ǵylym salasyn jańǵyrtý, ýniversitetterdiń jańa róli men olardyń múmkindikterin ulttyq ekonomikany reformalaý isine paidalaný jóninde sóz boldy.
Prezident «Sakraldy Qazaqstan» ǵylymi-zertteý ortalyǵynyń jetekshisi Berik Ábdiǵalimen «Ulytaý-2019» halyqaralyq týristik forýmynda usynylǵan bastamalardyń iske asyrylý máselelerin talqylady. Sonymen qatar, elimizde etnotýrizmdi keńinen nasihattaý qajettigine erekshe nazar aýdaryldy.
