Memleket basshysyna biylǵy 7 aidaǵy aqsha-nesie saiasatyn iske asyrýdyń aldyn ala qorytyndylary týraly esep berildi, dep habarlaidy "Ult aqparat" Aqordanyń resmi saityna silteme jasap.
Ulttyq bank tóraǵasy Prezidentke koronavirýstyń jańa tolqynynyń taralýyna bailanysty Halyqaralyq valiýta qorynyń álemdik ekonomikany qalpyna keltirý qarqyny men qarjy naryqtaryn túzetýge qatysty boljamdardy qaita qaraǵany jóninde aqparat berdi.
Áńgimelesý barysynda álemdik ekonomikany qalpyna keltirýde infliatsiia men infliatsiialyq boljamdar basty kedergi ekeni atap ótildi. Memleket basshysyna elimizdegi infliatsiianyń jyldam ósý sebebi (2021 jylǵy shildedegi qorytyndy boiynsha – 8,4%) jáne infliatsiiany turaqtandyrý maqsatynda Ulttyq banktiń bazalyq mólsherlemeni (9,25%-ǵa deiin) kóterý týraly sheshimi jóninde málimet berildi.
Erbolat Dosaev karantindik shekteýler kezinde iskerlik belsendilikti birtindep qalpyna keltirý, Ulttyq banktiń altyn-valiýta qory men Ulttyq qordaǵy qarajattyń jaǵdaiy, sondai-aq, zeinetaqy aktivteri ósiminiń oń dinamikasy týraly da baiandady.
Prezidentke tólem balansynyń aǵymdaǵy shoty týraly aityldy. Aldyn ala málimetterge qaraǵanda, birinshi jartyjyldyqta ekonomikalyq belsendiliktiń artýy men tutynýshylyq importtyń ósýi saldarynan 1,7 milliard AQSh dollary kóleminde tapshylyq qalyptasqan.
Áńgimelesý sońynda Qasym-Jomart Toqaev Ulttyq qordyń aktivterin saqtaýǵa jáne arttyrýǵa erekshe nazar aýdaryp, Úkimetpen birlesip infliatsiiany turaqtandyrý boiynsha tiimdi sharalar qabyldaýdy tapsyrdy.
