Prezident Qasym-Jomart Toqaev qoldaýshylar forýmynda ultty uiystyratyn jeti qaǵidany atady, - dep habarlaidy "Ult aqparat" Aqordanyń baspasóz qyzmetine silteme jasap.
"Birinshi. Táýelsizdik bárinen qymbat.
Men byltyr osy tujyrym týraly arnaiy maqala jariialadym. Biz egemendigimizdi saqtai alsaq qana ult bolyp, el bolyp tura alamyz. Táýelsiz memleket qana óziniń tilin, jerin, dinin, dilin saqtap qalady. Sondyqtan Táýelsizdik - biz úshin eń basty qundylyq.
Táýelsizdikti qorǵaý jáne nyǵaitý - árbir azamatqa, bárimizge ortaq mindet! Taǵy da qaitalap aitamyn. Damyǵan, órkenietti el bolamyz desek, eńbekti eń basty orynǵa qoiýymyz kerek.
Eńbekqorlyq óskeleń urpaqtyń boiyna sińgen qasiet bolýǵa tiis. Bul qasiet bizdiń ómir saltymyzǵa ainalýy kerek. Masyldyq nietten, bos sózden arylýymyz qajet. Táýelsizdikti nyǵaitýǵa naqty ispen úles qosý - ár azamattyń perzenttik paryzy. Eńbek adamy bizdiń qoǵamda qashanda qurmetke ie bolady. Sebebi eńbekqor adam óz sózin árdaiym ispen dáleldei alady.
Ekinshi. Eldiktiń negizi - jerimizdiń tutastyǵy.
Babalarymyz urpaǵyna ulan-ǵaiyr jerdi miras etti. Biz onyń bir ýys topyraǵyna deiin qasterlep, atamekenimizdi qorǵai bilýimiz kerek.
Úshinshi. Memleket múddesi - qasterli qundylyq.
Aýyldan Aqordaǵa deiingi sheshimniń bári osy turǵydan qabyldanýy qajet. Bir sózben aitsaq, ár iste memlekettik ustanym bolýy kerek.
Tórtinshi. Rýhani úndestik - birliktiń bastaýy.
Tól tarihymyz, ana tilimiz ben ata dinimiz - eldi biriktiretin biregei qundylyqtar. Ony daý-damaiǵa ainaldyrýǵa bolmaidy. Jurtty adastyryp, teris jolǵa salýdan saqtanǵan jón.
Qazaqstanda túrli etnos ókili ómir súrip jatyr. Olardyń maqsaty - bir, bolashaqqa degen kózqarasy - ortaq. Bárimiz - bir eldiń azamatymyz. "Áralýandyq arqyly - birlikke" qaǵidaty eshqashan ózektiligin joǵaltpaidy. Biz etnosaralyq tatýlyqty saqtai bilýimiz kerek. "Qazaqstan azamaty" degen uǵym jalpyulttyq biregeiliktiń ózegi bolýy qajet. Sonda birtutas ult retinde keleshekke senimmen qadam basamyz.
Memleket múddesi degenimiz - halyqtyń múddesi. Sondyqtan barlyq sheshimder, jobalar, zańdar men jarǵylar el múddesin qorǵaýǵa arnalady. Týǵan elge janashyrlyq ár azamatqa tán qasiet bolýǵa tiis.
Besinshi. Zańdylyq pen tártip - órkenietti el bolýdyń kepili.
Zań talaptary barlyq salada múltiksiz oryndalýǵa tiis. Zań aldynda - bári teń. Zań aldynda bári birdei jaýap beredi.
Sonda ǵana biz zańy múltiksiz oryndalatyn, tártibi qatań saqtalatyn Ádiletti memleket quramyz.
Altynshy. Jasampazdyq - jańarý men jańǵyrý joly.
Bizdiń basty maqsatymyz - Otanymyzdy órkendetý, memleketimizdi damytý. Ozyq bilim men qajyrly eńbek qana eldi tabysqa jetkizedi. Básekege qabiletin arttyrýǵa múmkindik beredi. Qazir ǵylym ekonomikany jedel alǵa jeteleitin alyp indýstriiaǵa ainaldy.
Qazaqstan jahandyq ekonomikadaǵy úrdisterge sai bolýǵa tiis. Bizge de osy ǵylymi-tehnologiialyq jańashyldyqty ákelip, óndiriske qosatyn jańa ári bilikti mamandar kerek. Biz olarǵa qajet jaǵdaidyń barlyǵyn jasaimyz.
Sebebi adam kapitaly - eń qundy bailyǵymyz. Muny ýaqyt jáne tájiribe dáleldedi. Osylaisha, Qazaqstannyń innovatsiianyń, jańa tehnologiianyń, tyń ideialardyń, aýqymdy kapitaldyń ortalyǵy bolýǵa zor múmkindigi bar.
Jetinshi. Dostyq peiil, meiirimdilik jáne janashyrlyq - eń asyl qasietter.
Qazaqta "Syilassań - syily bolarsyń" degen sóz bar. Aǵaiynnyń tatýlyǵy men janashyrlyǵy - el birliginiń túp qazyǵy. Eldiń tutastyǵy qarapaiym adamdardyń ózara túsinistiginen bastalady.
Halqymyz bárin de aqyl-parasatpen sheshken. Bul dástúrdi umytpaýymyz kerek. Aǵa býyn osy igi dástúrdi nasihattaýy qajet. Jalpy, ortaq jetistikter ulttyń mereiin ósiredi.
Biz bir-birimizge qashanda tilektes bolýymyz qajet. Talapty, daryndy azamattardy qoldai bilýimiz kerek. Ár otandasymyzdyń tabysyna qýanyp, qiyndyqtardy birge eńserýge tiispiz. Halqymyz "Uiymdasqan utady" dep beker aitpaǵan. Birligimizdi bekemdei bilsek, eldigimizdi saqtap qalamyz. Sonda ǵana Ádiletti Qazaqstandy quramyz", - dedi Prezident.
