Memleket basshysy Qasym-Jomart Toqaev Túrkiia Prezidentiniń atyna quttyqtaý jedelhatyn joldady, dep habarlaidy "Ult aqparat" Aqordaǵa silteme jasap.
Qasym-Jomart Toqaev Rejep Taiip Erdoǵanǵa joldaǵan jedelhatynda Túrkiianyń ulttyq meiramy – Respýblika kúnimen shyn júrekten quttyqtap, Qazaqstan halqynyń jáne jeke óz atynan izgi nietin jetkizdi.
Qazaqstan Prezidenti búginde Túrkiianyń saiasi, áleýmettik-ekonomikalyq jáne mádeni-gýmanitarlyq baǵytta orasan tabystarǵa qol jetkizgenin, óńirlik jáne jahandyq mańyzy zor máselelerdi sheshýdegi belsendiligi men tabandylyǵy arqyly álemdik sahnada laiyqty orynǵa ie bolǵanyn atap ótken. Sondai-aq Qasym-Jomart Toqaev qýatty Anadoly eliniń armanyn arqalaǵan saiasatker Rejep Taiip Erdoǵannyń eńbegi árdaiym jemisti bolýyna tilektestik bildirgen.
– Qazaqstan men Túrkiia arasynda qalyptasqan dástúrli dostyq pen ózara qoldaýǵa negizdelgen san qyrly salalardaǵy strategiialyq áriptestigimiz bolashaqta óziniń jalǵasyn taýyp, baýyrlas halyqtarymyzdyń igiligi úshin qarqyndy dami beretinine kámil senemin. Syndarly da mazmundy ekijaqty dialogymyzdy jalǵastyrý jáne seriktestigimizge tyń serpin berý joldaryn talqylaý úshin jýyq arada Ózińizben Túrkitildes memleketteri yntymaqtastyǵy keńesiniń 8-shi sammitinde júzdesýdi asyǵa kútemin. Osy múmkindikti paidalanyp, qymbatty baýyrym, Sizge sarqylmas kúsh-qýat, jaýapty qyzmetińizge tolaǵai tabys, al túrik aǵaiyndaryma baiandy órkendeý men qut-bereke tileimin, – dep jazylǵan jedelhatta.
