Prezident Qasym-Jomart Toqaev «Qazaqstan» telearnasyna bergen suhbatynda halyqtyń arasyndaǵy Elbasy tulǵasyna qatysty pikirtalastar týraly paiymyn bildirdi, dep habarlaidy QazAqparat.
«Máselege jan-jaqty qaraityn bolsaq, halyq narazylyǵynyń astarynda ótkir áleýmettik másele jatyr. Halyqtyń kóbiniń áleýmettik jaǵdaiy tómen. Bul – aqiqat. Memlekettiń tutas bailyǵy az ǵana toptyń qolynda. Teńsizdik beleń alýda. Narazylyqtyń túp-tamyry osydan bastaldy. Bul másele týraly men Parlamentte, basqa da jiyndarda aittym.
Ókinishtisi, azamattardyń narazylyǵyn lańkester men qylmyskerler paidalanyp ketti. Buǵan bárimiz kýá boldyq. Rasynda, áleýmettik jelide Tuńǵysh Prezidentimiz týraly ártúrli oilar aitylyp, jazylyp jatyr. Qansha adam bolsa, sonsha pikir bolady», - dedi Memleket basshysy.
Sondai-aq, Nursultan Nazarbaevtyń 30 jyldyq eńbegin joqqa shyǵarýǵa bolmaidy dep esepteitinin basa aitty.
«Tarihqa qiianat jasamaý kerek. Nursultan Nazarbaev – memleketimizdiń irgesin qalaǵan, memlekettigimizdi nyǵaitýǵa zor úles qosqan tulǵa. Onyń qyzmetine ádil baǵa berýge mindettimiz. Tuńǵysh Prezidenttiń kemshilikteri bolsa, odan jas basshylar sabaq alýy qajet. Qańtar oqiǵasy elimizge de, meniń ózime de úlken sabaq bolǵany sózsiz. Tiisti qorytyndy jasaldy. Qazir elimizde bolyp jatqan saiasi sheshimder − sonyń nátijesi. Aldymyzda óte kóp jumys bar. Muny barlyǵy kórip, bilip otyr dep oilaimyn», - dedi Prezident.
