Foto: Akorda.kz
Qasym-Jomart Toqaev Digital Bridge halyqaralyq forýmy aiasynda TikTok kompaniiasynyń bas direktory Shoý Chýmen kezdesý ótkizdi, dep habarlaidy "Ult aqparat" Aqordanyń baspasóz qyzmetine silteme jasap.
Prezident elimizde TikTok platformasynyń tanymaldylyǵy artyp kele jatqanyn atap ótti. Qazir oǵan 10 millionnan astam qazaqstandyq tirkelgen. Beinekontent jasaýǵa jáne qaraýǵa arnalǵan álemge tanymal servis alǵashqylardyń biri bolyp qosymsha interfeisin qazaq tiline aýdardy. Sondai-aq kiberbýllingtiń aldyn alý máseleleri boiynsha ýákilin taǵaiyndady.
Óz kezeginde Shoý Chý Astana Hub halyqaralyq tehnoparkimen birlesip, TikTok StartUp Academy jobasyn – qazaqstandyq startaptarǵa arnalǵan ekskliýzivti bilim berý baǵdarlamasyn júzege asyryp jatqany týraly baiandady. Budan bólek, seriktestik aiasynda TikTok Startup Valley baiqaýy ótkizildi. Nátijesinde 200-den astam startap óz ónimderin TikTok arqyly jarnamalaý ádisterin úiretý kýrsynan ótti.
Kezdesý barysynda kreativti indýstriia salasyndaǵy yntymaqtastyq, jasandy intellekt boiynsha zertteý júrgizý, elektrondy saýdany damytý, sondai-aq TikTok platformasy arqyly Qazaqstannyń mádenieti men týristik múmkindikterin jahandyq deńgeide nasihattaý máseleleri qarastyryldy.
