Memleket basshysynyń Sankt-Peterbýrgke sapary Tatarstan prezidenti Rýstam Minnihanovpen kezdesýden bastaldy, dep habarlaidy "Ult aqparat" Aqordaǵa silteme jasap.
Kezdesý barysynda Qazaqstan men Tatarstannyń saýda-ekonomikalyq jáne mádeni-gýmanitarlyq salalardaǵy yntymaqtastyǵyn keńeitý perspektivalary dostyq rýhta talqylandy. Ekonomikanyń mańyzdy sektorlaryndaǵy birlesken jobalardy Qazaqstan aýmaǵynda júzege asyrýǵa, elimizdiń zaýyttaryn Resei Federatsiiasynyń óndiris júiesimen qatar damytýǵa basa mán berildi.
Sonymen qatar, "KAMAZ" jáne "Tatneft" kompaniialarymen birlesken jobalardy júzege asyrý barysy qarastyryldy. Kezdesýge bul kompaniialardyń da basshylary qatysty.
Qasym-Jomart Toqaev Rýstam Minnihanovqa iltipat bildire otyryp, óziniń Tatarstanǵa barǵan saparyn airyqsha yqylaspen eske aldy. Onyń nátijeleri yntymaqtastyqty odan ári nyǵaitýǵa tyń serpin berdi.
"Ýaǵdalastyqtarymyzdyń qalai júzege asyrylyp, kózdegen maqsatqa qalai qoljetkizip jatqanymyzdy kórip otyrmyn. Bári de baqylaýda dep aitýǵa bolady", - dedi Qazaqstan Prezidenti.
Qasym-Jomart Toqaev Qazaqstannyń Reseimen kópjaqty qatynastarynda mańyzdy oryn alatyn qazaq-tatar bailanystarynyń qarqyndy damyp kele jatqanyn atap ótti.
2021 jyldyń qorytyndysy boiynsha Respýblikamen aradaǵy taýar ainalymy 423 million dollar boldy. Biylǵy tórt aidyń ishinde 143 million dollarǵa jetti. Mashina jasaý salasyndaǵy iri jobalar tabysty júzege asyrylyp jatyr. Qazaqstan men Reseidiń Óńiraralyq forýmy yntymaqtastyqty keńeitýge jaqsy múmkindik beredi.
Óz kezeginde Rýstam Minnihanov Peterbýrg halyqaralyq ekonomikalyq forým aiasynda kezdesýge múmkindik týǵyzǵanyna rizashylyǵyn bildirip, tatar kompaniialarynyń qazaqstandyq seriktesterimen yqpaldastyq ornatýyna qoldaý kórsetip jatqany úshin Qasym-Jomart Toqaevqa alǵys aitty.
"Qazaqstan kompaniialarynyń Resei naryǵyna Tatarstan arqyly kirýge múmkindik alýyna paidamyzdy tigizgimiz keledi. Biz tolyqqandy qoldaý kórsetip, yqpal etýge daiynbyz", - dedi Tatarstan prezidenti.
