Qazaqstan Prezidenti Qasym-Jomart Toqaev QHR Tóraǵasy Si Tszinpinmen kelissózder júrgizdi, dep habarlaidy "Ult aqparat" Aqordaǵa silteme jasap.
Qasym-Jomart Toqaev pen Si Tszinpinniń resmi kezdesýiniń saltanatty sharasy barysynda Qazaqstan Respýblikasy men Qytai Halyq Respýblikasynyń memlekettik Ánurandary oryndaldy. Qurmetti qaraýyl bastyǵy raport berdi. Memleketter basshylary Qurmetti qaraýyldyń qataryn aralap shyqty. Sodan keiin Qurmet qaraýylynyń rotasy Qazaqstan Prezidenti men Qytai Tóraǵasynyń aldynan sap túzep ótti. Zeńbirekterden dúrkin-dúrkin oq atylyp, Memleketter basshylaryna qurmet kórsetildi.
Saltanatty shara aiaqtalǵan soń Qasym-Jomart Toqaev pen Si Tszinpin kelissóz zalyna ótti.
Qazaqstan Prezidenti qytai kóshbasshysymen Bishkekte ótken Shanhai Yntymaqtastyq Uiymynyń sammitinen keiin araǵa birneshe ai salyp, qaita jolyqqanyna óte qýanyshty ekenin aitty. Qasym-Jomart Toqaev QHR Tóraǵasyna qonaqjailyq kórsetkeni úshin rizashylyq bildirip, qytai kóshbasshysynyń dosy, Qazaqstannyń Tuńǵysh Prezidenti Nursultan Nazarbaevtyń sálemi men ystyq yqylasyn jetkizdi.
– Bizdiń kezdesýimiz QHR-nyń 70 jyldyq mereitoiy qarsańynda ótip otyr. Osy sátti paidalanyp, Sizdi jáne tutas qytai halqyn aitýly datamen quttyqtaǵym keledi. Qytai bul mereitoiǵa áleýmettik-ekonomikalyq jáne saiasi damý turǵysynan zor jetistikpen jetip otyr. Osy oqiǵa tek Qytai Halyq Respýblikasy úshin ǵana emes, kúlli álem úshin tarihi mánge ie dep oilaimyn. Sizdiń memlekettiń damýy dúniejúziniń jiti nazarynda,– dep atap ótti Memleket basshysy.
Memleket basshysynyń aitýynsha, osy jetpis jyldyq jol qytai úshin óte aýyr boldy. Biraq 1970 jyldardyń sońynda Den Siaopinniń basshylyǵymen qolǵa alynǵan reformalardyń arqasynda qytai halqy óz damýynda orasan zor jetistikke jetti.
– Qytaidyń tabystary memleketterimiz arasyndaǵy yntymaqtastyqty damytý úshin berik negiz bolady dep sanaimyz. Búgin biz Birlesken málimdemege qol qoiamyz. Bul qujat boiynsha Qazaqstan men Qytai uzaqmerzimdi, strategiialyq jáne jan-jaqty seriktestikti damytýǵa beiildi ekenin kórsetedi. Joǵary deńgeide qol jetkizgen ýaǵdalastyq eki el arasyndaǵy yntymaqtastyqty odan ári damytý úshin salmaqty quqyqtyq jáne saiasi baza bolyp tabylady, – dedi Qazaqstan Prezidenti.
QHR Tóraǵasy Si Tszinpin óz sózinde Qazaqstannyń Ortalyq Aziiadaǵy iri el sanalatynyn jáne Ortalyq Eýraziiada úlken yqpaly bar ekenin aitty.
– Qazaqstannyń Tuńǵysh Prezidenti Nursultan Nazarbaevtyń basshylyǵymen elderińiz zor tabysqa qol jetkizdi, ulttyq erekshelikke negizdelgen damý úlgisin qurdy. Siz Prezident bolǵannan keiin ózińizdiń sabaqtastyq, ádilettilik jáne ilgerileý jónindegi úsh ustanymyńyzdy jariialadyńyz. Ekonomikany damytýdy, jumys oryndaryn ashýdy, sybailas jemqorlyqpen kúresýdi, áleýmettik qorǵaý deńgeiin kóterýdi aldyńyzǵa maqsat etip qoidyńyz. Bul – Qazaqstan halqynyń úmitin aqtaidy. Sizdiń barlyq bastamalaryńyz osyǵan baǵyttalǵan. Dostas Qazaqstan halqyna baq-bereke jáne tabys tileimin, – dedi Qytai kóshbasshysy.
Qazaqstan Prezidenti Qasym-Jomart Toqaev pen Qytai Halyq Respýblikasynyń Tóraǵasy júrgizgen kelissózder qorytyndysy boiynsha mynadai qujattarǵa qol qoiyldy:
- Memleketter basshylarynyń birlesken málimdemesi;
- Qazaqstan Respýblikasynyń Úkimeti men Qytai Halyq Respýblikasy Úkimetiniń arasyndaǵy aviatsiialyq izdeý jáne azamattyq áýe kemelerin qutqarý salasyndaǵy yntymaqtastyq týraly kelisim;
- Qazaqstan Respýblikasynyń Úkimeti men Qytai Halyq Respýblikasy Úkimetiniń arasyndaǵy «Nurly jol» jańa ekonomikalyq saiasaty (NJ JES) men «Jibek jolynyń ekonomikalyq beldeýi» (JJEB) qurylysyn ushtastyrý jónindegi yntymaqtastyq josparyn júzege asyrýǵa bailanysty ózara kómek týraly memorandým;
- Qazaqstan Respýblikasynyń Úkimeti men Qytai Halyq Respýblikasy Úkimetiniń arasyndaǵy QHR Úkimetiniń Qazaqstan tarapyna sýperkompiýter berý jobasy jónindegi yntymaqtastyq týraly kelisim;
- Qazaqstan Respýblikasynyń Saýda jáne integratsiia ministrligi men Qytai Halyq Respýblikasynyń Kommertsiia ministrligi arasyndaǵy ózara túsinistik týraly memorandým;
- Qazaqstan Respýblikasynyń Aýyl sharýashylyǵy ministrligi men Qytai Halyq Respýblikasynyń Bas keden basqarmasy arasyndaǵy Qytai Halyq Respýblikasyna Qazaqstan Respýblikasynan eksporttalatyn sút ónimderine qoiylatyn inspektsiialyq, karantindik jáne veterinarlyq-sanitarlyq talaptar jónindegi hattama;
- Qazaqstan Respýblikasynyń Aýyl sharýashylyǵy ministrligi men Qytai Halyq Respýblikasynyń Bas keden basqarmasy arasyndaǵy Qytai Halyq Respýblikasyna Qazaqstan Respýblikasynan eksporttalatyn jún shikizatyna qoiylatyn inspektsiialyq, karantindik jáne veterinarlyq-sanitarlyq talaptar jónindegi hattama;
- Qazaqstan Respýblikasynyń Qarjy ministrligi men Qytai Halyq Respýblikasynyń Bas keden basqarmasy arasyndaǵy ziiatkerlik menshik quqyǵyn shekara mańy qorǵaý salasyndaǵy yntymaqtastyqty nyǵaitý jónindegi memorandým;
- Qazaqstan Respýblikasynyń Aýyl sharýashylyǵy ministrligi men Qytai Halyq Respýblikasynyń Bas keden basqarmasy arasyndaǵy Qytai Halyq Respýblikasyna Qazaqstan Respýblikasynan eksporttalatyn zyǵyrǵa qoiylatyn inspektsiialyq, karantindik jáne veterinarlyq-sanitarlyq talaptar jónindegi hattama;
- Qazaqstan Respýblikasy men Qytai Halyq Respýblikasy arasyndaǵy keden shekarasy arqyly taýarlar men kólik quraldaryn alyp ótý týraly aldyn ala aqparat almasý jónindegi tehnikalyq spetsifikatsiia.
