Qazaqstan Prezidenti Qasym-Jomart Toqaev video konferentsiia rejiminde Shveitsariia Prezidenti Gi Parmelanmen kelissóz ótkizdi. Eki el basshylary saiasi, saýda-ekonomikalyq salalardaǵy yntymaqtastyqtyń qazirgi ahýaly men perspektivalaryn talqylady, dep habarlaidy Aqorda.
Taraptar Qazaqstan men Shveitsariia arasyndaǵy qatynastardyń damý qarqynyn joǵary baǵalap, kólik, logistika, mashina jasaý, aýyl sharýashylyǵy, týrizm, joǵary tehnologiia men «jasyl» ekonomika salalary boiynsha iskerlik bailanystardy nyǵaitýǵa jáne birlesken investitsiialyq jobalardy júzege asyrýǵa basa mán berdi.
Qasym-Jomart Toqaev Shveitsariiany Qazaqstannyń Eýropadaǵy negizgi saiasi, saýda jáne ekonomikalyq seriktesteriniń biri retinde atap ótti. Búginde elimizde Shveitsariia kapitalynyń qatysýymen 40-tan astam kásiporyn men kompaniia tabysty jumys istep jatyr.
– Eki el arasyndaǵy ózara tiimdi jáne tabysty yntymaqtastyqty jalǵastyrýǵa qajetti múmkindiktiń bári bar dep oilaimyn. Ózara yqpaldastyǵymyzdyń barlyq salasyna tyń serpin berý bizdiń mindetimiz, – dedi Qazaqstan Prezidenti.
Óz kezeginde Gi Parmelan Qazaqstan men Shveitsariia arasyndaǵy bailanystardyń damýyna kóńili tolatynyn jetkizdi.
– Biz qyzyǵýshylyq tanytqan salalar boiynsha yntymaqtastyq durys jolǵa qoiylǵanyn atap ótkim keledi. Aldaǵy ýaqytta bul yqpaldastyqty odan ári nyǵaityp jáne keńeite túsetinimizge senimdimin, – dedi Shveitsariia Prezidenti.
Memleket basshysy qol jetkizgen ýaǵdalastyqtardy júzege asyrýda Saýda-ekonomikalyq yntymaqtastyq jónindegi ekijaqty úkimetaralyq komissiianyń jáne Iskerlik keńestiń mańyzdy róline toqtaldy. Sonymen qatar Prezident ekonomikanyń túrli sektoryndaǵy seriktestik aiasyn keńeitýdi jáne taraptardyń áleýetin eskere otyryp, taýar ainalymynyń túrlerin kóbeitýdi usyndy.
Osy rette Qasym-Jomart Toqaev Qazaqstannyń temirjol infraqurylymyn damytý jónindegi jobalarǵa qatysýǵa niet bildirgen shveitsariialyq kompaniialardy qoldaitynyn aitty.
Memleket basshysy shveitsariialyq áriptesine Qazaqstandaǵy áleýmettik-ekonomikalyq ózgerister men elimizdiń investitsiialyq klimatyn jaqsartýǵa baǵyttalǵan sharalar týraly málimet berdi.
Kelissóz barysynda koronavirýs indetiniń taralýyna qatysty ahýal da qarastyryldy. Qazaqstan Prezidenti elimizdegi pandemiianyń saldaryn eńserýge baǵyttalǵan sharalar jáne halyqqa jappai tegin ekpe salý jumystary jaiynda aita kelip, shveitsariialyq kompaniialarǵa kórsetken kómegi men COVID-19 indetine qarsy kúreste qoldaǵany úshin rizashylyǵyn bildirdi.
Áńgimelesý sońynda Qasym-Jomart Toqaev pen Gi Parmelan halyqaralyq kún tártibindegi birqatar ózekti másele boiynsha, sonyń ishinde, Qazaqstan men Shveitsariianyń kópjaqty qurylymdar aiasyndaǵy yqpaldastyǵy jaiynda pikir almasty. Taraptar jahandyq beibitshilik pen qaýipsizdikti saqtaý, ornyqty damýdy qamtamasyz etý, klimattyń ózgerýine qarsy kúresý, Ortalyq Aziiadaǵy transshekaralyq sýlardy ádil ári tiimdi paidalanýǵa yqpal etý máseleleri boiynsha konstrýktivti dialogty jalǵastyra berýge daiyn ekenin naqtylady.
