Foto: Akorda.kz
Sailaý eldi bóletin emes, biriktiretin naýqan bolýy kerek. Bul týraly Memleket basshysy Qasym-Jomart Toqaevtyń Parlament Senatynyń otyrysynda aitty, dep habarlaidy "Ult aqparat" Aqordanyń baspasóz qyzmetine silteme jasap.
«Birneshe aptadan keiin saiasi naýqan bastalady. Kandidattar úgit-nasihat jumysyna kirisedi. Olar daýys jinaý úshin túrli tásilderdi qoldanady. Bul – qalypty demokratiialyq úderis.
Qazaqstanda pikir alýandyǵyna eshqandai shekteý qoiylmaidy. Zańǵa qaishy kelmeitin barlyq is-áreketke ruqsat beriledi. Degenmen, bir nárseni bárimiz qaperde ustaýymyz kerek. Sailaý eldi bóletin emes, biriktiretin naýqan bolýy kerek.
Taǵy da aitqym keledi: úmitkerler qoǵamǵa iritki salatyn áreketten aýlaq bolǵany jón. Ańdamai aitylǵan artyq sóz nemese oilanbai jasalǵan oqys qadam búkil eldiń bolashaǵyna kesirin tigizedi. Árbir otandasymyz osyny durys túsinýge tiis» - dedi Prezident.
Memleket basshysy bolashaq aldynda barlyǵy birdei jaýap beretinin aitty.
«Pliýralizm memleketti evoliýtsiialyq jolmen damytýǵa múmkindik beredi. Bizde saiasi kózqarasy ártúrli partiialar bar. Kandidattardyń túrli másele boiynsha ustanymdarynyń birdei bolmaýy da zańdy qubylys. Biraq, kózqarastary múlde qabyspaityn ymyrasyz qarsylastardyń ózine ortaq qundylyqtar bar. Ol – bizdiń qasietti Otanymyz jáne qasterli Táýelsizdigimiz.
Men bul týraly «Táýelsizdik bárinen qymbat» atty maqalamda aittym. Óitkeni, Táýelsizdik úshin kúres kúndelikti eńbekpen jáne eldik saiasatpen tyǵyz bailanysyp jatyr. Bolashaqtyń aldynda bárimiz birdei jaýap beremiz. Keiingi urpaq kimniń saiasi ustanymy qandai bolǵanyna mán beredi.
Aǵa býynnyń olarǵa qandai memleketti miras etkenine qarap, búgingi kúnin baǵalaityn bolady. Sondyqtan, biz ortaq maqsat jolynda birigýimiz kerek» - dedi Toqaev.
