Memleket basshysy Qasym-Jomart Toqaev 31 mamyr – Saiasi qýǵyn-súrgin jáne asharshylyq qurbandaryn eske alý kúnine orai úndeý jariialady, - dep habarlaidy Aqorda.
***
Qurmetti otandastar!
HH ǵasyrdyń 20-50 jyldaryndaǵy saiasi qýǵyn-súrgin zobalańy – halqymyzdyń tarihyndaǵy qasiretti kezeń.
Qazaqstan táýelsizdik alǵannan keiin osy náýbettiń qurbandaryn máńgi este qaldyrý úshin memlekettik deńgeidegi tiisti sharalardy júzege asyra bastady.
1993 jyly «Jappai saiasi qýǵyn-súrgin qurbandaryn aqtaý týraly» zań qabyldandy.
1997 jyly Elbasy N.Nazarbaevtyń Jarlyǵymen 31 mamyr Saiasi qýǵyn-súrgin qurbandaryn eske alý kúni retinde belgilendi.
Keńes zamanynda ómir súrgen halyqtarǵa «úlken terrordyń» orasan zor qasiret ákelgeni esimizde. Zulmat jyldarda Qazaqstanǵa KSRO-nyń túkpir-túkpirinen bes millionnan astam adam jer aýdaryldy.
100 myńǵa jýyq azamatymyz qýǵyn-súrginge ushyrap, sonyń 20 myńnan astamy atyldy.
Jazyqsyz jazalanǵandardyń qatarynda Á. Bókeihan, A. Baitursynuly, M. Tynyshbaev, M. Dýlatuly, T. Rysqulov, M. Jumabaev, S. Seifýllin, I. Jansúgirov, B. Mailin, S. Asfendiiarov siiaqty kórnekti memleket jáne qoǵam qairatkerleri, basqa da ult ziialylary bar.
Otanyn satqandar áielderiniń Aqmola lageri («ALJIR») sol jyldardaǵy qatygezdik pen jaýyzdyqtyń qara tańbasyndai boldy. Munda saiasi tutqyndardyń jaqyn týystary, áielderi men balalary qamaldy.
Búgin biz ujymdastyrý jyldarynda ashtyqqa ushyraǵandardy, sondai-aq týǵan jerinen ketýge májbúr bolǵandardy da eske alamyz. Bul zobalańnyń qasiretin úsh millionǵa jýyq adam tartty.
Sol jyldardaǵy orasan zor adam shyǵyny men taǵdyr taýqymeti árbir azamattyń júregine jara saldy.
Totalitarizmnen zardap shekken kóptegen ult ókilderi úshin qazaq jeri qutty mekenge ainaldy. Ata-babalarymyzdan daryǵan qaisarlyq pen tózimdiliktiń arqasynda qatań synnan abyroimen ótip, birtutas ult retinde birigýge múmkindik aldyq.
Búginde respýblika óńirlerinde «Qazaq halqyna – myń alǵys» monýmentteri ornatylǵan. Bul – qazaq jurtynyń aq peiili men danalyǵyna degen sheksiz rizashylyqtyń belgisi.
Tarihi ádildikti qalpyna keltirý jumystaryn aiaqtap, saiasi qýǵyn-súrgin qurbandaryn aqtaý úshin arnaiy memlekettik komissiia qurýdy tapsyrdym.
Biz jazyqsyz jazalanǵandardyń árqaisysyn este saqtaý arqyly ǵana kemel keleshekke jol ashamyz. Bolashaqtyń berik negizi Táýelsizdikten bastaý alady.
Ótken ǵasyrdaǵy eń qily kezeńniń birinde jazyqsyz japa shekkenderdiń rýhyna taǵzym etý – barshamyzdyń perzenttik boryshymyz.
