Prezident Qasym-Jomart Toqaev premer-ministrdiń orynbasary – saýda jáne integratsiia ministri Baqyt Sultanovty qabyldady, - dep habarlaidy "Ult aqparat" Aqordanyń resmi saityna silteme jasap.
Memleket basshysyna Qazaqstannyń DSU-ǵa múshe elder ministrleriniń 12-konferentsiiasyna tóraǵalyǵynyń qorytyndysy týraly baiandaldy. Jiyn barysynda mańyzdy sheshimder qabyldanǵan. Atap aitqanda, DSU-ny reformalaý úderisin bastaýǵa jáne 20 jyldan astam ýaqytqa sozylǵan Balyq aýlaý sýbsidiialary týraly jańa kelisimdi qabyldaýǵa qoljetkizildi.
Qasym-Jomart Toqaevqa ministrliktiń syrtqy saýdany damytý jáne ekonomikalyq integratsiia aiasynda ulttyq múddeni qorǵaý jumystarynyń nátijesi usynyldy.
Premer-ministrdiń orynbasary – Saýda jáne integratsiia ministri biylǵy 4 aidyń ishinde shikizattyq emes taýarlar eksporty byltyrǵy osy kezeńmen salystyrǵanda 33,9 paiyzǵa artyp, 5,6 milliard dollardan 7,5 milliard dollarǵa deiin óskenin málimdedi. Qyzmet kórsetý eksporty 5,8 milliard dollarǵa jetken.
Memleket basshysyna transshekaralyq habtardy jáne saýda-logistikalyq infraqurylymdy órkendetý, sonyń ishinde "Soltústik – Ońtústik" kólik dálizi men Transkaspii halyqaralyq kólik baǵyty boiymen damytý jónindegi jobalardyń júzege asyrylý barysy týraly málimet berildi.
Sonymen qatar Baqyt Sultanov Úkimettiń negizgi azyq-túlik taýarlary baǵasynyń turaqtylyǵy men qoljetimdiligin qamtamasyz etý sharalary jóninde esep berdi. Onyń aitýynsha, 2022-2024 jyldarǵa arnalǵan azyq-túlik qaýipsizdigin qamtamasyz etý jónindegi jospardyń júzege asyrylýy 2024 jylǵa qarai importqa táýeldi negizgi taýarlar boiynsha halyqty júz paiyz qamtamasyz etýge múmkindik beredi.
Kezdesý sońynda Prezident syrtqy saýda qyzmetin jandandyrý jáne shetel naryǵyndaǵy Qazaqstan ónimderin ilgeriletý jóninde tapsyrma berdi. Memleket basshysy ishki naryqty qamtamasyz etý úshin negizgi azyq-túlik taýarlary eksportyn retteý qajet ekenine basa mán berdi.
