Memleket basshysy Pavlodar oblysyna jumys sapary barysynda Prezidenttik jastar kadr rezerviniń osy óńirdegi ókilderimen kezdesti, dep habarlaidy "Ult aqparat" Aqordanyń resmi saityna silteme jasap.
Prezidenttik jastar kadr rezerviniń birqatar ókili, atap aitqanda, Ertis aýdanynyń ákimi Aian Beisekin, «Nur Otan» partiiasy oblystyq filialy tóraǵasynyń birinshi orynbasary Ilia Terenchenko jáne «Ekibastuz MAES – 2» AQ direktorlar keńesiniń múshesi Damir Súientaev Memleket basshysynyń aldynda sóz sóilep, berilip otyrǵan múmkindik úshin alǵys aitty. Olardyń aitýynsha, Prezidenttik jastar kadr rezervin qurý, aýyl ákimderin sailaý siiaqty bastamalar jastarǵa jol ashyp otyr.
Qasym-Jomart Toqaev jastardan óńirdegi ózekti máseleler týraly surap, kadr rezervinde bolýdyń jaýapkershiligin atap ótti.
– Jastar kadr rezervi degenimiz – memlekettiń rezervi. Másele úlken bastyq bolýda emes, rezerv ókili bolýdyń máni – el úshin aianbai eńbek etýde. Memlekettiń damýy jolynda ózderińizdei mamandar qajet. Biz búgin osy óńirdegi jáne elimizdegi túitkildi máselelerdi ashyq talqyladyq. Sony júzege asyrýǵa sizderdiń kómekterińiz qajet bolady. Barlyq bastamalaryńyzǵa tabys tileimin, – dedi Qazaqstan Prezidenti.
