Memleket basshysy Qasym-Jomart Toqaev Polsha Prezidenti Andjei Dýdamen telefon arqyly sóilesti, dep habarlaidy Aqorda.
Polsha tarapynyń bastamasymen bolǵan áńgimelesý barysynda Qasym-Jomart Toqaev pen Andjei Dýda ekijaqty qarym-qatynastardyń jáne halyqaralyq kún tártibiniń ózekti problemalaryn, sonyń ishinde Polshanyń 2022 jyly EQYU-ǵa tóraǵalyǵyna qatysty máselelerdi talqylady.
Qazaqstan Prezidenti polshalyq áriptesin Varshavanyń aldaǵy jylǵy Eýropadaǵy qaýipsizdik jáne yntymaqtastyq uiymyna tóraǵalyǵymen quttyqtap, is júzinde tyǵyz yqpaldastyq ornatýǵa, sonyń ishinde EQYU-nyń 2010 jylǵy Astana sammitinde qabyldanǵan málimdemelerdi júzege asyrýǵa daiyn ekenin naqtylady.
Andjei Dýda Qasym-Jomart Toqaevqa Polsha tóraǵalyǵynyń negizgi basymdyqtary, sonyń ishinde shielenisip ketken qaqtyǵystardy Uiym aiasynda retteýge septigin tigizý jóninde málimet berdi.
Taraptar Qazaqstan men Polsha arasyndaǵy kópjaqty yntymaqtastyqtyń qarqyndy damyp kele jatqanyn atap ótti. Ekonomikanyń negizgi sektorlaryndaǵy investitsiialyq yntymaqtastyqty keńeitýge eki jaq ta múddeli ekenin bildirdi.
Qazaqstan men Polsha prezidentteri Aýǵanstandaǵy qazirgi ahýalǵa qatysty pikir almasty. Qasym-Jomart Toqaev pen Andjei Dýda aýǵan daǵdarysy gýmanitarlyq problemalardy, terrorizm men ekstremizmge, zańsyz migratsiia men esirtki tasymalyna qarsy kúres máselelerin sheshý úshin barlyq múddeli taraptyń belsendi ári konstrýktivti túrde atsalysýyn qajet etedi degen ortaq pikirge keldi.
Áńgimelesý sońynda prezidentter aldaǵy kezeńge arnalǵan ekijaqty is-sharalar kestesin talqylady.
