Foto: Akorda.kz
Memleket basshysy Germaniianyń Federaldyq kantslerimen keńeitilgen quramda kelissóz júrgizdi, dep habarlaidy "Ult aqparat" Aqordanyń baspasóz qyzmetine silteme jasap.
Prezident Qasym-Jomart Toqaev erekshe qurmet kórsetkeni úshin Germaniianyń Federaldyq kantsleri Olaf Sholtske rizashylyǵyn bildirip, elimizdiń Eýropa Odaǵyndaǵy negizgi seriktesi – Germaniiamen aradaǵy yntymaqtastyqty damytýǵa Qazaqstan airyqsha mán beretinine nazar aýdardy.
Memleket basshysynyń aitýynsha, Astana men Berlin barlyq deńgeide belsendi ári ózara senimdi saiasi dialog júrgizip kele jatyr jáne kópjaqty alańdar aiasynda tyǵyz qarym-qatynas ornatqan.
Búginde Germaniia – Qazaqstan ekonomikasyna qarjy quiǵan jetekshi investorlardyń jáne eń iri saýda seriktesteriniń biri. Germaniianyń Ortalyq Aziia óńirimen saýda-sattyǵynyń shamamen 83 paiyzy Qazaqstannyń úlesine tiesili. 2022 jyldyń qorytyndysy boiynsha ekijaqty taýar ainalymy 25 paiyzǵa ósip, 2,8 milliard dollardy qurady.
Memleket basshysy saýda-ekonomikalyq bailanystardy odan ári nyǵaitýdyń áleýeti zor jáne otandyq naryqqa Germaniia biznesiniń barynsha kóbirek kelýi úshin Qazaqstan barlyq qajetti jaǵdaidy jasaýǵa daiyn ekenin atap ótti. Munai-gaz himiiasy, sirek kezdesetin metallýrgiia ónerkásibi, «jasyl» energetika, kólik jáne logistika, aýyl sharýashylyǵy salalary basym baǵyttar retinde anyqtaldy.
Qasym-Jomart Toqaev naqty qadam retinde jeke nemis investorlary qatysatyn jobalardy qarjylandyrý boiynsha ekijaqty Jumys tobynyń qoldaýymen Shikizatty birlese igerý jobalaryn iske asyrý jónindegi konsortsiým qurýdy usyndy.
Kólik-tranzit salasyndaǵy yntymaqtastyqty nyǵaitýǵa erekshe nazar aýdaryldy.
Qasym-Jomart Toqaev Germaniia tarapyn Transkaspii baǵytynyń áleýetin paidalanýǵa, sondai-aq Kaspiidegi Aqtaý jáne Quryq porttarynyń infraqurylymyn damytý isine qatysýǵa shaqyrdy.
Sonymen qatar nemis tarapyn jańartylatyn energiia kózderin, sonyń ishinde «jasyl» sýtegin damytý úshin anaǵurlym tyǵyz qarym-qatynas ornatýǵa úndedi.
Bul rette Mańǵystaý oblysynda Svevind Energy nemis-shved kompaniiasymen birlesip júzege asyrylyp jatqan «jasyl» sýtegin óndirý jobasynyń mańyzdylyǵy atap ótildi.
Sonymen qatar Prezident nemis áriptesteriniń nazaryn Qazaqstan azamattaryna qatysty viza rejimin jeńildetý múmkindikterine aýdardy.
Óz kezeginde Federaldyq kantsler Olaf Sholts Germaniia tarapynyń Qazaqstanmen jan-jaqty yntymaqtastyqty keńeitýge múddeli ekenin rastady. Kantsler Qazaqstanda júrgizilip jatqan aýqymdy saiasi jáne áleýmettik-ekonomikalyq reformalardy tolyq qoldaitynyn ári oǵan oń baǵa beretinin jetkizdi. Kantslerdiń pikirinshe, zań ústemdigin qamtamasyz etý – eldi ornyqty damytýdyń jáne sheteldik investorlardy qoldaýdyń eń basty sharty.
Germaniia tarapy Qazaqstanmen aradaǵy saýda-ekonomikalyq jáne investitsiialyq bailanystardy nyǵaitýǵa daiyn ekenin naqtylady. Atap aitqanda, munai jetkizý kólemin ulǵaitýǵa, jetkizý tizbegin ártaraptandyrýǵa jáne infraqurylymdyq jobalardy iske asyrýǵa qyzyǵýshylyq tanytty. Sondai-aq «Jasyl» energetikany paidalaný jáne klimat máselesin birlesip ilgeriletý baǵytynda qarqyndy qarym-qatynasty jolǵa qoiý qajet ekenine nazar aýdardy. Eki eldiń shaǵyn jáne orta biznes ókilderi úshin qolaily jaǵdai jasaý maqsatynda birlesken jumysty jandandyrýǵa basa mán berildi.
