Foto: Akorda.kz
Memleket basshysy Tájikstan Prezidentimen kelissóz júrgizdi, - dep habarlaidy "Ult aqparat" Aqordanyń baspasóz qyzmetine silteme jasap.
Tájikstan Prezidentiniń Astanaǵa sapary shaǵyn quramdaǵy kelissózderden bastaldy.
Qasym-Jomart Toqaev ekijaqty yntymaqtastyqty nyǵaitý úshin bul sapardyń mańyzy zor ekenin atap ótti.
– Sizdiń saparyńyz bizdiń baýyrlas elderimiz arasyndaǵy shynaiy dostyq qarym-qatynasty odan ári nyǵaitý turǵysynan zor mańyzǵa ie. Elderimiz arasyndaǵy strategiialyq seriktestik, odaqtastyq qarym-qatynas týraly aitýǵa tolyq negiz bar. Astanadaǵy tájik mádenieti kúnderiniń ashylýyna Sizdiń arnaiy kelýińizdiń ózi kóp nárseni ańǵartady, – dedi Prezident.
Óz kezeginde Emomali Rahmon kórsetilgen qurmet úshin rizashylyǵyn bildirdi.
– Qurmetti Qasym-Jomart Kemeluly, shaqyrtýyńyzǵa, iltipatyńyzǵa, qonaqjailyq kórsetkenińizge kóp raqmet! Eń aldymen, búgin Sizben eki el arasyndaǵy qarym-qatynastyń ahýaly men perspektivalaryn, sondai-aq halyqaralyq jáne aimaqtyq máselelerdi talqylaǵym keledi, – dedi Tájikstan Prezidenti.
Odan keiin kelissózder eki eldiń delegatsiia músheleriniń qatysýymen ótti.
Qasym-Jomart Toqaev Qazaqstanda Tájikstanmen aradaǵy dostyq qarym-qatynasty joǵary baǵalaitynyn jetkizdi.
– Baýyrlas tájik halqyna qazaq jerinde airyqsha qurmetpen qaraidy. Otandastarymyz qazirgi Tájikstan týraly kóbirek bilip, tájik halqynyń bai mádenietimen tereńirek tanysqysy keledi. Osy oraida sizdiń osyndai aýqymdy is-sharalar uiymdastyrý týraly bastamańyzdy Qazaqstan halqy men elimizdiń qonaqtary erekshe yqylaspen qabyl aldy. Bul aitýly shara eki el arasyndaǵy diplomatiialyq qarym-qatynastyń ornaǵanyna 30 jyl tolǵan kezeńde ótkizilýiniń erekshe simvoldyq máni bar, – dedi Prezident.
Memleket basshysy barlyq saladaǵy ekijaqty yntymaqtastyqtyń, sonyń ishinde sý jáne energetika keshenindegi ózara is-árekettiń qarqyndy damyp kele jatqanyn atap ótti.
– Sý jáne energetika salalaryndaǵy mindettemelerdi oryndaýǵa, atap aitqanda, Qazaqstanǵa sý jáne elektr energiiasyn jetkizýge bailanysty sheshimdi ýaqtyly qabyldaǵanyńyz úshin Sizge jáne barsha tájik tarapyna alǵysymyz sheksiz. Qazaqstan óz tarapynan Sizdiń aldyńǵy saparyńyz kezinde ózara kelisken barlyq mindettemeni oryndap jatyr, – dep atap ótti Qasym-Jomart Toqaev.
Qasym-Jomart Toqaev Tájikstan Prezidenti Emomali Rahmonnyń mamyr aiynda Qazaqstanǵa sapary kezinde qol qoiylǵan Qazaqstan men Tájikstan arasyndaǵy odaqtastyq ózara is-qimyl týraly deklaratsiianyń sátti júzege asyrylyp jatqanyn atap ótti. Prezidenttiń aitýynsha, biyl 6 aida taýar ainalymy 500 million dollardan asqan. Bul rette ózara saýda-sattyq kólemin 2 milliard dollarǵa deiin arttyrý josparlanyp otyr.
Tájikstan Prezidenti de ekijaqty yntymaqtastyqtyń qazirgi jaǵdaiyna joǵary baǵa berdi
– Tájikstannyń mádeniet kúnderin jáne kórmesin, sondai-aq elimizdiń aýyl sharýashylyǵy men ónerkásip sektory ónimderiniń jármeńkesin Astana, Almaty jáne Shymkent qalalarynda ótkizýge qoldaý kórsetkenińiz úshin alǵys aitamyn. Bul sharalardy Tájikstan men Qazaqstan arasyndaǵy qarym-qatynastyń, strategiialyq seriktestik pen odaqtastyqtyń úzdiksiz damýynyń bir belgisi dep baǵalaimyz. Bul sharalar eki el arasyndaǵy diplomatiialyq qarym-qatynastardyń ornaǵanyna 30 jyl tolǵan kezeńde ótýiniń ózindik máni bar. Búginde elderimiz arasyndaǵy qarym-qatynastyń ózara túsinistik, joǵary qurmet pen senimge negizdelgeni qýantady. Bailanystarymyzdy odan ári nyǵaitý Tájikstannyń syrtqy saiasatynyń negizgi basymdyǵy bolyp qala beredi, – dedi Tájikstan Prezidenti.
Áńgimelesý barysynda saýda-ekonomika, kólik-logistika, aýyl sharýashylyǵy, energetika, qarjy jáne mádeni-gýmanitarlyq salalardaǵy ózara is-áreketti odan ári damytý perspektivalary talqylandy.
