Foto: Aqorda
Qazaqstan Respýblikasynyń Prezidenti Qasym-Jomart Toqaev Resei Federatsiiasynyń Prezidenti Vladimir Pýtinmen kezdesti, dep habarlaidy Ult.kz.
Memleket basshysy Sankt-Peterbýrgte ótken dástúrli kezdesýdiń mazmundy bolǵanyn atap ótip, kelissózder barysynda Eýraziialyq ekonomikalyq odaq pen Táýelsiz Memleketter Dostastyǵy aiasyndaǵy ózara yqpaldastyq máseleleri qaralǵanyn aitty.
«Jańa jyl qarsańynda dástúrge ainalǵan Peterbýrgtegi kezdesýimiz mazmundy ótti. Biz EAEO qyzmetine qatysty birqatar máseleni qarastyryp, sheshimder qabyldadyq. TMD formaty aiasyndaǵy yqpaldastyqtyń asa mańyzdy, ózekti máseleleri talqylandy. TMD – bedeldi ári zaman talabyna sai halyqaralyq uiym», – dedi Qasym-Jomart Toqaev.
Prezidenttiń aitýynsha, Qazaqstan men Resei arasyndaǵy ekijaqty qarym-qatynas qarqyndy damyp keledi. Ol 12 qarashada Reseige jasaǵan memlekettik saparynyń nátijeli ótkenin atap ótip, kórsetilgen qonaqjailyq úshin alǵys bildirdi.
«Qazaqstan Reseimen strategiialyq seriktestik jáne odaqtastyq bailanystarǵa erekshe mán beredi. Biz Qazaqstan men Resei azamattarynyń kúndelikti turmys-tirshiligine qatysty máselelerde birge áreket etýimiz qajet. Yntymaqtastyǵymyzdy nyǵaitýǵa baǵyttalǵan ortaq jumysymyz qos halyqtyń túpki múddesine sai keledi», – dedi Memleket basshysy.
Óz kezeginde Resei Prezidenti Vladimir Pýtin beiresmi kezdesý barysynda UQShU, TMD aiasyndaǵy qyzmet jáne ekijaqty yntymaqtastyqtyń jai-kúii talqylanǵanyn aitty.
«Biz kesheden beri biraz jumys atqardyq. Búgingi beiresmi kezdesý barysynda UQShU, TMD aiasyndaǵy qyzmetimizdi jáne ekijaqty yntymaqtastyq jaǵdaiyn talqyladyq. Qazaqstan men Resei arasyndaǵy ózara bailanystardyń basym baǵyttaryn damytý úshin arnaiy kezdeskenime qýanyshtymyn. Meniń oiymsha, barlyq sala oń qarqynmen alǵa ilgerilep keledi. Eki el arasynda sheshilmegen nemese túitkildi másele joq», – dedi Vladimir Pýtin.
Kezdesý Qazaqstan men Resei arasyndaǵy strategiialyq seriktestik pen odaqtastyq bailanystardy odan ári nyǵaitýǵa baǵyttalǵan.
