Frantsiia tarapynyń bastamasymen Qasym-Jomart Toqaev Emmanýel Makronmen telefon arqyly sóilesip, ekijaqty qarym-qatynastyń ózekti máselelerin jáne Aýǵanstandaǵy jaǵdaidy jan-jaqty talqylady, dep habarlaidy Aqorda.
Memleket basshysy strategiialyq seriktestik deńgeiine jetken Qazaqstan men Frantsiia arasyndaǵy ózara tiimdi bailanystardyń damýyna toqtaldy.
– Frantsýz Respýblikasy – ekonomikalyq áleýeti jaǵynan álemdegi besinshi el, bizdiń negizgi seriktesimiz. Biz naqty nátije beretin birlesken belsendi jumystarǵa, birinshi kezekte ekonomika salasyna erekshe mán beremiz, – dedi Qazaqstan Prezidenti.
Qasym-Jomart Toqaev Frantsiiany bizdiń ekonomikamyzǵa 2005 jyldan beri 17 milliard qarjy salýy arqyly investorlardyń alǵashqy bestigine kirip otyrǵanyn atap ótti.
2020 jyldyń qorytyndysy boiynsha ózara saýda kórsetkishi – 2,8 milliard dollardy quraǵan.
Emmanýel Makron Qazaqstanmen aradaǵy saýda-ekonomikalyq jáne saiasi bailanystardy tereńdete túsýge múddeli ekenin jetkizdi.
Memleketter basshylary úkimet deńgeiindegi bailanystardy jandandyrýǵa daiyn ekenin naqtylady.
Prezidentter Qazaqstan men Frantsiia yntymaqtastyǵyna serpin beretin jobalardyń júzege asýyna nazar aýdarýǵa ýaǵdalasty.
Qasym-Jomart Toqaev pen Emmanýel Makron Aýǵanstandaǵy ahýal jóninde pikir almasty.
Prezidentter aimaqtyń turaqtylyǵy, qaýipsizdigi men ornyqty damýyna qatysty máselelerde jii aqyldasyp turýǵa kelisti.
Mundai jumystar ekijaqty deńgeide de, BUU alańynda jáne halyqaralyq formatta da júzege asyrylmaq.
Frantsiia Prezidentiniń ótinishi boiynsha Qasym-Jomart Toqaev oǵan Qazaqstannyń Aýǵanstandaǵy jaǵdaidy turaqtandyrýǵa qatysty kózqarastary men bizdiń úkimettiń batys elderi azamattary men aýǵandyqtardy evakýatsiialaý jóninde qabyldaǵan sharalary týraly aityp berdi. Emmanýel Makron Qazaqstannyń óz aýmaǵynda BUU-nyń Aýǵanstandaǵy missiiasynyń qyzmetkerlerin jáne álemdik uiymnyń basqa da agenttikterin ornalastyrý týraly sheshimin joǵary baǵalady.
