Memleket basshysy Qasym-Jomart Toqaev Ózbekstannyń Olii Májilisi Zań shyǵarý palatasynyń tóraǵasy Nýrdinjon Ismoilovty qabyldady, dep habarlaidy "Ult aqparat" Aqordaǵa silteme jasap.
Qazaqstan Prezidenti Ózbekstan Respýblikasynyń Olii Májilisi Zań shyǵarý palatasynyń tóraǵasy N. Ismoilovqa iltipat bildire otyryp, elderimiz dostyq pen tatý kórshilikke, ortaq mádeni qundylyqtarǵa negizdelgen, memleketaralyq yntymaqtastyqtyń úlgisi bolatyn berik ári úilesimdi qatynastardy ornatqanyn atap ótti.
Qazaqstan Prezidenti ótken jyldyń jeltoqsan aiynda Shavkat Mirziioevtiń elimizge jasaǵan memlekettik saparyn joǵary baǵalady. Sol sapar qazaq-ózbek yntymaqtastyǵyn odaqtastyq deńgeiine kóterýge negiz bolǵan.
«Ózbekstan – Qazaqstan úshin baýyrlas, seriktes el. Sondyqtan eki el arasyndaǵy ózara qarym-qatynastardy damytýǵa basa mán beremiz. Bizdiń odaqtas qatynastarymyz keń aýqymdy jáne saiasi, saýda-ekonomikalyq, mádeni-gýmanitarlyq bailanystardy qamtidy. Osy rette parlament diplomatiiasy erekshe ról atqarady», – dedi Memleket basshysy.
Óz kezeginde Nýrdinjon Ismoilov Qasym-Jomart Toqaevqa kezdesýge ýaqyt bólgeni úshin alǵys bildirip, Ózbekstan Prezidentiniń izgi tilegi men sálemin jetkizdi.
