QR Prezidenti Qasym-Jomart Toqaev memlekettik organdardyń qyzmetindegi teris tájiribege saraptama júrgizýdi tapsyrdy, dep habarlaidy QazAqparat.
«Is júzinde kásipkerlerdiń talaptary boiynsha árbir ekinshi sheshim memlekettiń jáne laýazymdy tulǵanyń paidasyn kózdemegen. Men muny progress dep sanaimyn. Taǵy bir oń belgi - talaptardyń basym bóligin sottar kásipkerdiń memlekettik organdarmen tatýlasýyna bailanysty qaitarǵan. Biraq, sotqa shaǵymdar sany artyp keledi. Olardyń sany qazir 14 myńnan asady. Úkimetke Joǵarǵy sotpen jáne Ulttyq kásipkerler palatasymen birlesip, memlekettik organdardyń teris tájiribesin saraptaý jáne joiý boiynsha sharalar qabyldaýdy tapsyramyn», - dep atap ótti Memleket basshysy elimizdiń iri biznes ókilderimen kezdesýi barysynda.
QR Prezidentiniń atap ótýinshe, sot memlekettik organnyń bir qateligin qaita-qaita túzete beretin bolsa, onda ondai basshy óz ornynda otyrǵan joq degendi bildiredi.
«Joǵarǵy sotqa alańdatarlyq tsifrlarǵa nazar aýdarýdy ótinemin. Tómen turǵan sottardyń sheshimderine shaǵymdar boiynsha appeliatsiialyq men kassatsiialyq aktilerdiń jartysyna jýyǵy kásipkerlerdiń paidasyna qabyldanǵan. Bul bastapqy deńgeide sottardyń áli de bolsa ikemdelmegenin jáne múddelerdi jalǵan qorǵaýdan bas tartpaǵanyn bildiredi. Muny túzetý qajet. Kásipkerlerdiń mindeti - sot sarsańymen ýaqyt ótkizý emes, jumys isteý», - dedi Qasym-Jomart Toqaev.
