Memleket basshysy Qasym-Jomart Toqaev Májilis tóraǵasy Erlan Qoshanovty qabyldady, - dep habarlaidy "Ult aqparat" Aqordaǵa silteme jasap.
Prezidentke Májilistiń VII shaqyrylymynyń ekinshi sessiiasynda atqarylǵan zań shyǵarý jumystary týraly málimet berildi. Parlamenttiń tómengi palatasynyń spikeri qabyldanǵan birqatar zańnyń Memleket basshysy usynǵan reformalardy zańnamalyq turǵydan qamtamasyz etýge baǵyttalǵanyn atap ótti.
Erlan Qoshanovtyń aitýynsha, qazirgi ýaqytta depýtattar halyqpen kezdesýler ótkizip, jergilikti jerlerdegi ahýalmen tanysý úshin óńirlerge attanǵan. Olar azamattardyń kótergen mańyzdy degen problemalaryn zerttep, júieleidi. Sodan keiin Úkimetpen birlesip bul máselelerdi sheshetin bolady.
Májilis tóraǵasy Prezidentke Parlamenttiń tómengi palatasy jumysynyń jańa formaty, sonyń ishinde Qoǵamdyq palata qurý jóninde aitty.
Budan bólek, Erlan Qoshanov Qasym-Jomart Toqaevqa AMANAT partiiasynyń qoǵamdaǵy áleýmettik ádildikti qamtamasyz etýge jáne azamattardyń ál-aýqatyn arttyrýǵa baǵyttalǵan jumystary týraly baiandady. "Jer amanaty" jobasy aiasynda paidalanylmaityn jáne aýyl sharýashylyǵy maqsatyndaǵy zańsyz berilgen jerlerdi memleket menshigine qaitarý jumystary júrgizilip jatyr.
Partiia Úkimetpen birlesip, "Aýyl amanaty" jobasyn júzege asyrýda. Aýyl turǵyndary bólshek saýda jelisiniń talaptary men tutynýshylardyń suranysyn eskere otyryp, aýyl sharýashylyǵy ónimderin óndirý jónindegi jańa quzyretterdi úirenedi. Osy rette turǵyndar sany 7,7 million adam bolatyn 2400 aýyldyq okrýgti qamtý josparlanyp otyr.
Sonymen birge Májilis tóraǵasy Memleket basshysyna 23-24 maýsym aralyǵynda Cholpon-Ata qalasynda ótken Túrkitildes memleketterdiń Parlamenttik Assambleiasynyń XI plenarlyq otyrysyna qatysqan Qazaqstan delegatsiiasy jumysynyń qorytyndysy týraly baiandady.
