Memleket basshysy Qasym-Jomart Toqaev Úkimet basshysy Asqar Maminniń esebin tyńdady, dep habarlaidy Aqorda.
Qazaqstan Prezidentine biylǵy 5 aidaǵy elimizdiń áleýmettik-ekonomikalyq damýy, koronavirýs indetiniń taralýyna qarsy kúres jumystary jáne sanitarlyq-epidemiologiialyq ahýaldy jaqsartý jóninde esep berildi.
Memleket basshysyna daǵdarysqa qarsy sharalardyń júzege asyrylýy, 2020 jyldyń sońyna deiin ekonomikalyq ósimdi qalpyna keltirý jónindegi keshendi jospardyń oryndalýy jáne 2025 jylǵa deiingi strategiialyq damý josparynyń ázirlený barysy týraly baiandaldy.
Asqar Mamin Qasym-Jomart Toqaevqa koronavirýs pandemiiasynyń saldarynan álemdegi iskerlik belsendiliktiń birden tómendeýine bailanysty biylǵy qańtar men mamyr aralyǵynda ulttyq ekonomikanyń ósý qarqyny, byltyrǵy osy kezeńmen salystyrǵanda, 1,7% tómendegenin aitty. Úkimet basshysynyń málimeti boiynsha, ekonomikanyń birqatar salalarynda, atap aitqanda, taý-ken óndirisi, óńdeý, aýyl sharýashylyǵy, qyzmet kórsetý salalarynda, sondai-aq, negizgi kapitalǵa investitsiia tartý baǵytynda ósimniń oń qarqyny baiqalady.
Asqar Mamin barlyq sala boiynsha kóktemgi egis jumystarynyń tolyq aiaqtalǵany týraly da málimet berdi.
Budan bólek Premer-Ministr Prezidentke halyqty jumyspen qamtamasyz etýdiń keshendi sharalary biyl elimizdiń 1,22 million azamatyn qamtitynyn jetkizdi.
Qazaqstan Prezidenti elimizdiń birinshi jartyjyldyqtaǵy damý qorytyndylaryn talqylap, daǵdarys saldaryn eńserý mindetin qoiý úshin biylǵy shilde aiynda Úkimettiń keńeitilgen otyrysyn ótkizýdi josparlap otyr.
Kezdesý qorytyndysy boiynsha Qasym-Jomart Toqaev Asqar Maminge ekologiialyq týrizmdi damytý jóninde jáne basqa da birqatar naqty tapsyrma berdi.
