Memleket basshysy QHR Búkilqytailyq halyq ókilderi jinalysy Turaqty komitetiniń tóraǵasy Li Chjanshýmen kezdesti, dep habarlaidy "Ult aqparat" Aqordaǵa silteme jasap.
Kezdesý barysynda Qazaqstan Prezidenti Qasym-Jomart Toqaevtyń biylǵy 11-12 qyrkúiekte Qytaiǵa barǵan alǵashqy memlekettik saparynyń qorytyndylary men jasalǵan kelisimderi talqylandy. Sonymen qatar, qazaq-qytai jan-jaqty strategiialyq yntymaqtastyǵynyń qazirgi jaǵdaiy men damý perspektivalary jaily áńgimelesti.
Li Chjanshý Qazaqstan Prezidentine úlken qurmet kórsetkeni úshin rizashylyq bildirip, QHR Tóraǵasy Si Tszinpinniń shynaiy sálemin jetkizdi.
– Tóraǵa Si Tszinpin Sizdi memleketti basqarý isinde óz kózqarasy bar, ózara qarym-qatynasymyzdyń strategiialyq mańyzyn tereń túsinetin, tájiribesi mol saiasatker retinde joǵary baǵalaidy. Sondyqtan eki eldiń kóshbasshylary arasynda óte mańyzdy kelissózder ótti. Sizdiń elińiz bizge jaqsy dos, Siz de bailanystarymyzdyń damýyna zor úles qosyp otyrsyz, - dedi Li Chjanshý.
Qazaqstan Prezidenti eki el arasyndaǵy egemendik quqyqtardy ózara qurmetteýge, ainymas halyqaralyq qaǵidattarǵa jáne ózara tiimdi yntymaqtastyqty damýǵa negizdelgen dostyq bailanystardy atap ótti.
– Shyn máninde, bizdiń elder arasyndaǵy qarym-qatynas jóninde mańyzdy, irgeli kelisimder jasaldy. Bizdiń elderimizdiń qarym-qatynasy máńgilik strategiialyq sipatta. Bul kelisimderge Sizdiń de qosqan úlesińiz orasan. Elimizde mańyzdy is-sharaǵa qatysasyz. Sizge sáttilik tileimin! - dedi Qasym-Jomart Toqaev.
