Memleket basshysy Qasym-Jomart Toqaevtyń tóraǵalyǵymen ókiletti organdar basshylarynyń keńesi ótti, dep habarlaidy "Ult aqparat" Aqordanyń resmi saityna silteme jasap.
Jiynǵa Bas prokýratýranyń, Ulttyq qaýipsizdik komitetiniń, Qorǵanys jáne Ishki ister ministrlikteriniń birinshi basshylary, sondai-aq Prezident Ákimshiliginiń basshylyǵy men Qaýipsizdik Keńesiniń Apparaty qatysty.
Memleket basshysyna qańtar aiynyń birinshi onkúndiginde elimizdiń birqatar óńirinde bolǵan oqiǵalar boiynsha sotqa deiingi aldyn ala tergeý amaldarynyń barysy, sondai-aq arnaiy júrgizilgen operatsiialardyń nátijeleri, elimizde qoǵamdyq qaýipsizdik pen quqyqtyq tártipti qamtamasyz etý sharalary týraly baiandaldy.
Keńes qorytyndysy boiynsha Qasym-Jomart Toqaev birqatar naqty tapsyrmalar berdi. Qazaqstanda, sonyń ishinde Almatyda bolǵan qaiǵyly jaǵdailardy jan-jaqty zertteý máselesine, qaza bolǵan beibit turǵyndardyń naqty sanyn anyqtaýǵa, qiyn-qystaý kezderde kúshtik qurylymdardyń is-qimyldaryn úilestirýdiń jańa normativtik bazasyn ázirleýge basa mán berildi.
Qasym-Jomart Toqaev Qaýipsizdik Keńesiniń hatshysyna Arnaýly operatsiialar kúshterin jasaqtaý jumystaryn jedeldetýdi jáne ulttyq qaýipsizdik júiesin qaita qurý jóninde naqty usynys berýdi tapsyrdy.
Prezident lańkestikke qarsy operatsiialar men tergeý sharalaryn júrgizý barysynda azamattar quqyǵynyń buzylýyna jol bermeýdiń mańyzdy ekenin aitty.
