QR Prezidenti Qasym-Jomart Toqaev Táýelsizdigimizdiń 30 jyldyǵyna orai uiymdastyrylǵan Qaiyrymdy ister marafonynyń tabysty aiaqtalýymen quttyqtady. Memleket basshysynyń quttyqtaýyn «Jomart júrek» syilyǵy laýreattaryn marapattaý saltanatty is-sharasynda QR Aqparat jáne qoǵamdyq damý ministri Aida Balaeva oqyp berdi, dep habarlaidy QazAqparat.
«Barshańyzdy Táýelsizdigimizdiń 30 jyldyǵyna orai uiymdastyrylǵan Qaiyrymdy ister marafonynyń tabysty aiaqtalýymen quttyqtaimyn! Bul – halqymyzdyń asyl qasietterin dáriptep, kópshilikti jaqsylyq jasaýǵa jumyldyratyn jalpyulttyq joba. Mereili jylda elimizde qoǵamdyq mańyzy bar naqty jumystar atqarylýda. Osy marafon – sonyń jarqyn mysaly», - dep atap ótedi QR Prezidenti.
Memleket basshysynyń dereginshe, bastamany bir jyldyń ishinde 3 million otandasymyz qoldady. 15 myńnan astam qaiyrymdylyq sharasy uiymdastyrylyp, 200 myń adamǵa kómek berildi. Munyń bári Volonter jylyndaǵy igilikti ister jalǵasyn taýyp, dástúrge ainalǵanyn kórsetedi.
«Álemge indet taraǵan kezde halqymyz ult bolyp uiysýdyń ozyq úlgisin tanytty. Jomart jandar karantin shekteýlerine bailanysty tabysynan aiyrylǵan jurtqa qolynan kelgen kómegin aiaǵan joq. Óz qarjysyna dári-dármek men meditsinalyq qural-jabdyq alyp bergen azamattar da az emes. Shyn máninde, qiyndyqqa tap bolǵan adamǵa qamqorlyq jasaý – qanymyzda bar qasiet. Sondai-aq, baspanaǵa muqtaj júzdegen otbasyna qýanysh syilaǵan «AsarUme», «Qareket» qorlarynyń qyzmeti joǵary baǵalaýǵa laiyq. Mereitoilyq marafon aiaqtalǵanymen, kópshilikke sharapaty tietin qaiyrymdy ister jalǵasa beredi dep senemin. Jurtqa janashyrlyq tanytyp, halyqqa qamqorlyq kórsetip júrgen azamattarǵa shynaiy rizashylyǵymdy bildiremin. Barshańyzǵa zor densaýlyq, baq-bereke tileimin!» - dep atap ótedi Qasym-Jomart Toqaev.
