Prezident jekelegen memlekettik organdardyń basshylarymen keńes ótkizdi, dep habarlaidy "Ult aqparat" Aqordaǵa silteme jasap.
Memleket basshysy Qasym-Jomart Toqaevtyń tóraǵalyǵymen Prezident Ákimshiligi, Qaýipsizdik Keńesi, Bas prokýratýra, Ulttyq qaýipsizdik komiteti, Qorǵanys jáne Ishki ister ministrlikteri basshylarynyń keńesi ótti.
Memleket basshysyna elimizdegi ahýaldy turaqtandyrý úshin berilgen tapsyrmalardyń oryndalý barysy týraly baiandaldy. Ásirese qaýipsizdik pen quqyqtyq tártipti qaita qalpyna keltirýge, azamattardyń zańdy quqyqtaryn qamtamasyz etýge basa mán berildi.
Ishki ister ministri Erlan Turǵymbaev Prezidentke elimizdiń barlyq óńirinde júrgizilip jatqan «Quqyqtyq tártip» dep atalatyn shuǵyl aldyn alý sharalarynyń júzege asyrylý barysy týraly baiandady. Halyqtan zańsyz saqtap otyrǵan qarýlaryn alý isi jalǵasýda. Vedomstvonyń málimeti boiynsha terrorizm, kisi óltirý, bilik ókilderine zorlyq-zombylyq kórsetý, buzaqylyq, memlekettik organdardyń ǵimarattaryna shabýyl jasaý jáne basqa da qylmystar boiynsha 1 822 qylmystyq is qozǵalǵan. Onyń 116-sy arnaýly prokýrorlarǵa joldanǵan. IIM jeke qaýipsizdik departamenti janynan senim telefony iske qosylǵan. Ministrdiń aitýynsha, ustalǵan azamattardyń konstitýtsiialyq quqyqtarynyń buzylýyna jol bermeý maqsatynda quqyq qorǵaý uiymdarymen tyǵyz yqpaldastyq ornatylǵan.
Ulttyq qaýipsizdik komitetiniń tóraǵasy Ermek Saǵymbaev Memleket basshysyna lańkestik qaýipterdi joiý jáne keleshekte ondai qaterlerge jol bermeý mehanizmderin ázirleý jónindegi sharalar týraly baiandady.
Qorǵanys ministri Rýslan Jaqsylyqov Prezidentke qazirgi ýaqytta Qarýly Kúshterdiń jekelegen bólimsheleri ishki ister organdarymen birlesip, terroristik qaýiptiń «qyzyl» deńgeiinde turǵan óńirlerde quqyqtyq tártipti qamtamasyz etý jónindegi mindetterin oryndaýdy jalǵastyryp jatqanyn baiandady. Áskeri nysandardyń, sonyń ishinde qarý-jaraq jáne oq-dári qoimalarynyń kúzeti kúsheitilgen.
Qorǵanys ministrligi Memleket basshysynyń Qarýly Kúshterdi reformalaý jóninde bergen tapsyrmasyn oryndaýǵa kiristi.
Bas prokýror Ǵizat Nurdáýletov Memleket basshysyna terrorizm men jappai tártipsizdik derekteri boiynsha júrgizilip jatqan tergeý amaldarynyń barysy týraly esep berdi. Sonymen qatar ustalǵan jáne tutqyndalǵan azamattardyń quqyqtaryn qamtamasyz etý úshin prokýrorlardyń qabyldaǵan sharalary jóninde baiandady. Ǵizat Nurdáýletovtiń aitýynsha, olardyń bári qorǵaý, zańdy kómek alý, shaǵym jasaý quqyǵymen qamtamasyz etilip jatyr. Prokýratýra organdaryna qańtar oqiǵasyna qatysqan azamattardan 84 shaǵym túsken. Qadaǵalaý sharalary boiynsha ustalǵan 96 adam bosatylǵan.
Sonymen qatar qadaǵalaý organynyń jetekshisi naqty dáleli joq jaǵdailarda jazany jeńildetý jónindegi Memleket basshysynyń bergen tapsyrmasynyń oryndalý barysy týraly esep berdi. Berilgen málimetter boiynsha ákimshilik tártipke sáikes sottardyń sheshimimen 3314 adam tutqyndalǵan. Prokýrorlar 1884 iske qatysty jazany jeńildetý jóninde ótinish bergen. Olardy tekserý nátijesinde 1083 adam tutqynnan bosatylǵan. 493 azamatqa salynǵan aiyppul eskertý jazasyna aýystyrylǵan.
Baiandamalardy tyńdaǵan Memleket basshysy bolǵan oqiǵanyń barlyq mán-jaiyn anyqtaý jumystaryn jalǵastyrý qajet ekenin aitty.
Qasym-Jomart Toqaev aqparat salasyndaǵy kúshtik qurylymdar men ókiletti organdar kúsh-jigerlerin úilestirip, jurtshylyq tarapynan túsetin saýaldarǵa jedel jaýap berýge tiis ekenine toqtaldy.
Memleket basshysy turǵyndardyń qazasyna qatysty másele boiynsha Bas prokýratýraǵa jáne Ishki ister ministrligine árbir jaǵdaidy muqiiat tergep-tekserý jóninde tapsyrma berdi.
– Jurtshylyqtyń bolǵan oqiǵalar jóninde dolbar men qaýesetke negizdelgen pikir qalyptastyrýyna jol berýge bolmaidy. Azamattar biliktiń ashyqtyq pen zańdylyqty qamtamasyz etip otyrǵanyn kórýge tiis, – dedi Memleket basshysy.
Prezident Ákimshiliginiń basshylyǵyna atalǵan máseleni baqylaýǵa alý tapsyryldy.
