Foto: Akorda.kz
Qasym-Jomart Toqaev Aqordada Qazaqstanǵa resmi saparmen kelgen Togo Respýblikasynyń Prezidenti For Essozimna Gnassingbemen kelissóz júrgizdi, - dep habarlaidy "Ult aqparat" Aqordanyń resmi saityna silteme jasap.
Kelissóz aldynda Togo Prezidentin saltanatty qarsy alý rásimi ótti. Qasym-Jomart Toqaev pen For Gnassingbe bir-birine delegatsiia múshelerin tanystyrdy. Qurmet qaraýylynyń bastyǵy memleketter basshylaryna raport berip, Qazaqstan men Togonyń ánurandary shyrqaldy. Budan soń prezidentter shaǵyn quramda kelissóz júrgizdi.
Qasym-Jomart Toqaev For Gnassingbege iltipat bildirip, onyń Qazaqstanǵa tarihi sapary ekijaqty qarym-qatynastyń jańa kezeńine jol ashatynyn atap ótti.
– Qazaqstan Sizdiń elińizben jan-jaqty yntymaqtastyqty ilgeriletýge múddeli. Buǵan deiingi beiresmi áńgimelesý barysynda biz Qazaqstan men Togo arasynda yqpaldastyq ornatý úshin ózara múddeni kózdeitin qolda bar múmkindikterdi talqyladyq. Árine, elderimiz ártúrli qurlyqta, ártúrli aimaqta ornalasqan. Biraq bizge qazirgidei halyqaralyq kúrdeli jaǵdaida kúsh biriktirý kerek. Osy oraida Qazaqstan men Togo, sondai-aq basqa da memleketter halyqaralyq qatynastardy qalypqa keltirý úshin bir bolýy qajet, – dedi Prezident.
Kezdesý barysynda Memleket basshysy Qazaqstan men Togo kúsh jumyldyra otyryp, aldaǵy ýaqytta atqara alatyn negizgi salalardy aiqyndady. Qasym-Jomart Toqaevtyń pikirinshe, ekijaqty jáne halyqaralyq kún tártibin ilgeriletý úshin turaqty dialog ornatý qajet.
Óz kezeginde Prezident For Gnassingbe jyly shyrai tanytqany úshin Qasym-Jomart Toqaev pen Qazaqstan halqyna alǵys aitty.
– Men Sizge jáne barsha Qazaqstan jurtshylyǵyna Togo halqynyń ystyq yqylasyn jetkizgim keledi. Eki eldiń igiligi jolyndaǵy yntymaqtastyqqa tyń serpin berý úshin zor múmkindik bar, – dedi Togo Prezidenti.
Budan keiin prezidentter eki el delegatsiialarynyń qatysýymen keńeitilgen quramda kelissóz júrgizdi.
