Memleket basshysy Qasym-Jomart Toqaev qazaqstandyqtardy jańa 2024 jylmen quttyqtady, - dep habarlaidy "Ult aqparat" Aqordanyń baspasóz qyzmetine silteme jasap.
"Qadirli Otandastar! Bárimiz bir el bolyp Jańa jyldy qarsy alyp otyrmyz. Barshamyz eski jyldy oi eleginen ótkizemiz, aldaǵy jylǵa jospar jasap, jańa maqsat qoiamyz. Biz osy sátte bir-birimizge aq tilegimizdi arnaimyz, syi-qurmet kórsetemiz. Qasietti Otanymyzdyń berekeli birligi jurtymyzdyń osyndai tatý tirliginen bastalady.
2023 jyl Qazaqstan úshin tabysy men taýqymeti qatar kelgen jyl boldy. Ómirde qýanysh pen qiyndyqtyń alma-kezek bolýy – zańdylyq. Biraq biz eńsemizdi tik ustap, keleshekke árdaiym senimmen qaraimyz.
Biyl jurtymyz Jańa jyldy kópten kútken jaǵymdy jańalyqpen qarsy alýda. Jaqynda halqymyzdyń sany 20 millionǵa jetti. Elimiz úshin bul aq túieniń qarny jarylǵan kún boldy. Halyq sanynyń ósýi – myqty memleket bolýdyń jáne órkendeýdiń kepili. Al baqytty otbasy – baqýatty eldiń arqaýy.
Qazaqstan strategiialyq baǵdary aiqyn el retinde turaqty damyp kele jatyr. Biz yntymaq-birliktiń jáne qajyrly eńbektiń arqasynda aýqymdy is-sharalar atqardyq. Jańarý men jańǵyrý jolyndaǵy mańyzdy reformalardy júzege asyrdyq. Osylaisha, memlekettigimizdiń tuǵyryn bekemdei tústik. Zań men Tártip ústemdigin ornatýdy memlekettik saiasattyń negizgi baǵdary dep jariialadyq. Osy baǵytta naqty sharalardy qabyldaýǵa kiristik. Bilim berý jáne densaýlyq saqtaý salasynda aýqymdy jobalardy qolǵa aldyq. Ádildikke negizdelgen jańa ekonomikalyq úlgige kóshe bastadyq. Iaǵni, halyqtyń turmys sapasyn jaqsartý úshin asa mańyzdy qadam jasadyq. Shetelden milliardtaǵan dollar investitsiia tarttyq. Sonyń arqasynda elimizge asa qajet óndirister ashyldy. Jumys oryndary paida boldy. El ekonomikasynyń basty qozǵaýshy kúshi retinde shaǵyn jáne orta bizneske jan-jaqty qoldaý kórsetetin boldyq.
Zańsyz alynǵan ekonomikalyq aktivterdi elge qaitarý jumysy jalǵasýda. Memleketke qaitarylǵan qarjy kóp uzamai halyqtyń igiligine jumsalatyn boldy, iaǵni mektepter salyna bastady. Jyldar boiy igerilmei kelgen milliondaǵan gektar jer adal sharýalarǵa beriletin boldy.
Jumysshylardyń, injenerlerdiń jáne sharýalardyń eseli eńbegi, áskeriler men quqyq qorǵaý organdary qyzmetkerleriniń qasterli Otanymyzǵa qaltqysyz qyzmeti, kásipkerlerdiń tabysty jobalary, mádeniet qairatkerleriniń shyǵarmashylyǵy jáne ǵalymdardyń elge paidaly zertteýleri arqyly ultymyzdyń jasampazdyq áleýeti arta tústi.
Óz kásibin minsiz atqaryp júrgen muǵalimder, meditsina qyzmetkerleri jáne basqa da eńbek adamdary – búgingi kúnniń naǵyz batyrlary. Volonterler, metsenattar, qutqarýshylar jáne ózge de janashyr azamattar igi ister jasap, jankeshti erlik kórsetip, tilektestik pen qamqorlyqtyń ozyq úlgisin tanytty. Biz jańa qoǵamdyq etikany qalyptastyrý, eńbekqorlyq pen bilimpazdyqty dáripteý jáne kreativti ekonomikany damytý úshin kóptegen mańyzdy jumysty qolǵa aldyq.
Elimizde kásibi sportpen qatar, buqaralyq sport qarqyndy damýda. Ásirese, balalar dene shynyqtyrýmen belsendi ainalysatyn boldy. Sol sebepti memleket aýyldyq jáne qalalyq jerlerde jańa sport nysandaryn salyp jatyr.
Qazaqstan uzaq merzimge arnalǵan ulttyq múddesine sai keletin saliqaly syrtqy saiasat júrgizip, halyqaralyq arenadaǵy bedelin arttyra tústi. Bir sózben aitqanda, osy jyl bizdiń elimiz úshin mol tabysqa, jarqyn sátterge jáne mańyzdy oqiǵalarǵa toly boldy. Jalpy, ekonomikamyz 4,9 paiyzǵa ósti. Tutas jurt bolyp kóptegen ózekti máseleni sheshe bastadyq. Osylaisha, elimizdiń damýyna tyń serpin berdik. Eń bastysy, biz jalpyǵa birdei múmkindik beretin Ádiletti Qazaqstandy qurýǵa kiristik. Júrgizilgen reformalar óz jemisin bere bastady. Bul – bárimizge ortaq is. Sondyqtan men osy mańyzdy jumysqa atsalysqan barsha azamatqa alǵys aitamyn.
Jańa jyl – árdaiym jańa mindetter júkteletin, jańa syn-qaterlerdi eńseretin kezeń. Biz kelesi jyly ulttyń qaita órleýiniń kýási bolamyz. Men buǵan kámil senemin. Alaida básekege qabiletti ári damyǵan el bolý úshin áli de kóp ter tógýimiz qajet.
Jańa jylda memlekettigimizdi nyǵaitý jáne halyqtyń ál-aýqatyn arttyrý jolyndaǵy júieli reformalar jalǵasyn tabady. Biz zań men tártiptiń ústemdigin ornyqtyrý úshin keshendi sharalar qabyldaimyz. Memleket tarapynan ónerkásipti, aýyl sharýashylyǵyn, energetika jáne ekonomikanyń basqa da salalaryn órkendetýdi kózdeitin tyń bastamalar qolǵa alynady. Biz áleýmettik jaǵdaiy tómen, kómekke muqtaj jandarǵa árdaiym qamqor bolamyz. Muǵalim, dáriger, qutqarýshy, áskeri qyzmetshi, tártip saqshysy jáne basqa da kásip ielerine qoldaý kórsetemiz.
Biz jas urpaqtyń jarqyn bolashaǵyna jol ashatyn mańyzdy sheshimder qabyldap jatyrmyz. Jaqynda Ulttyq qordaǵy qarjynyń bir bóligi balalardyń esepshotyna túse bastaidy. Elimizdiń jastary bolashaqqa nyq senimmen qaraýy kerek.
Kelesi jyly ultymyzdyń tarihyna bailanysty birqatar is-shara ótkiziledi. Halqymyzdyń tulǵalaryn este saqtap, olardyń eńbegin dáripteý – urpaq paryzy. Sondai-aq aldaǵy jyly elimizde Dúniejúzilik kóshpendiler oiyny ótedi. Sportshylarymyz Jazǵy olimpiadaǵa qatysady. Túptep kelgende, ár azamat óz salasynyń naǵyz mamany bolýy kerek. Sonda ǵana Otanymyz ósip-órkendeidi.
Biz árbir tańǵa úmit artamyz, árbir jyldan jaqsylyq kútemiz. Al úmittiń aqtalýy, arman-maqsattyń oryndalýy ózimizge bailanysty. Eń bastysy, elimizdegi tatýlyqty, tynyshtyq pen turaqtylyqty baǵalaiyq. Birligi myqty eldiń rýhy biik bolady. Uly Abai aitqandai, birlik degenimiz – eń aldymen, aqylǵa – birlik. Memlekettigimizdi saqtaý úshin aýyzbirshiligimizdi saqtaiyq. Qasterli Otanymyzdy kórkeitemiz desek, tabandy eńbek eteiik.
Damyǵan memleket bolý úshin ozyq bilimge umtylyp, jańa tehnologiiany, sonyń ishinde jasandy intellektini igerýimiz qajet. Árdaiym bir-birimizge qamqor bolaiyq. Úlkenge – qurmet, kishige – izet kórseteiik. Balalarymyzdyń tárbiesine basa mán bereiik. Úlgi-ónege bolyp, ulaǵatty urpaq ósireiik.
Táýelsizdik urpaqtary jaqsy qasietterdi boiyna sińirip ósip keledi. Olar ónerde, sportta, ǵylymda jáne bizneste zor tabysqa jetýde. Biz jastarymyzdyń osyndai myqty, adal azamat bolǵanyn maqtan tutamyz. Qazaqstannyń bolashaǵy – otanshyl, bilimdi, eńbekqor azamattardyń, iaǵni jastardyń qolynda. Men jas urpaqtyń jasampazdyq qýatyna senemin!
Biz – bárimiz tek bolashaqqa, tek alǵa umtylatyn memleket bolýymyz kerek. Biz bir el bolyp biriksek, kez kelgen belesti baǵyndyramyz. Eń bastysy, elimiz tynysh, irgemiz bútin bolsyn!
Jańa jylǵa deiin sanaýly sekýndtar qaldy. Tabaldyryqtan attaǵaly turǵan jyl bárimiz úshin jetistikterge toly bolsyn!
Sonymen qatar búgin Jańa jyldyń qarsańynda jumys istep jatqan adamdarǵa arnaiy quttyqtaýymdy joldaimyn. Sizder elimizge adal qyzmet etip júrsizder. Men barshańyzǵa shynaiy rizashylyǵymdy bildiremin.
Jańa jyl ár shańyraqqa, ár azamatqa qýanysh pen shattyq ákelsin! Úlkenderimiz aman bolsyn! Balalardyń armany oryndalsyn! Eńbekterińiz jemisti bolsyn! Tórt qubylamyz túgel bolsyn! Kók týymyz máńgi jelbiresin! Ánuranymyz shyrqala bersin!
Jańa jyl qutty bolsyn, aǵaiyn!" - dedi Toqaev.
