QR Prezidenti Qasym-Jomart Toqaev Kómirtegi beitaraptyǵyna qol jetkizý ózekti máselege ainalǵanyn atap ótti, dep habarlaidy QazAqparat.
«Qazir dúnie júzi ekologiialyq túitkilderdi sheshýge erekshe mán berýde. Kómirtegi beitaraptyǵyna qol jetkizý ózekti máselege ainaldy. Paidaly qazbalardy jappai igerýden bas tartyp jatqan elderdiń sany artyp keledi. Biz bul úderisten tys qala almaimyz. Máseleni tiimdi sheshý jolyn qarastyrýymyz kerek. Qazaqstannyń kómirsýtegi qory mol. Soǵan qaramastan, biz jańartylatyn qýat kózderin damyta beremiz. Bul mindet «Jasyl ekonomikaǵa» kóshý týraly tujyrymdamada kórinis tapty. Josparlanǵan sharalar 2060 jylǵa qarai kómirtegiden arylýǵa jol ashady. Sondai-aq, aldaǵy on jylda parnikti gaz shyǵarýdy 15 paiyzǵa azaitýǵa múmkindik beredi. Osynyń aiasynda biz 2025 jylǵa deiin 500 myń gektar jerge 2 milliard túp aǵash otyrǵyzýdy josparlaýdamyz», - dedi Memleket basshysy Túrki memleketteri uiymynyń sammitinde.
Buǵan qosa qazir elimizdegi jańartylatyn qýattyń úlesin 3 paiyzǵa jetkizildi.
«Ony 2030 jylǵa qarai 15 paiyzǵa deiin arttyramyz. Sol maqsatpen Nur-Sultan qalasynda «Jasyl tehnologiialar men investitsiialyq jobalardyń halyqaralyq ortalyǵyn» ashtyq», - dedi Prezident.
Sonymen qatar Q. Toqaev qazir sýtegi energetikasynyń mańyzy artyp kele jatqanyn eske saldy. Halyqaralyq qaýymdastyq ony «taza» otynnyń jańa túri dep sanaidy.
«Biz bul salany damytý úshin arnaiy ortalyq quryp, innovatsiiany paidalaný tájiribesin zertteýge kiristik. Qazaqstanda jasyl sýteginiń ónerkásiptik klasterin qurýǵa mol múmkindik bar. Elimizdiń ǵylymi áleýeti jetkilikti, bilikti kadrlarmen de qamtamasyz ete alamyz. Osy oraida, elderimizdiń basty ǵylymi mekemelerin jumyldyryp, Halyqaralyq konsortsiým qurýdy usynamyn. Bul qurylym sýtegini óndiretin, ony saqtap, tasymaldaityn jańa tehnologiiany damytý úshin qajet. Munda ǵalymdarymyz bas qosyp, ózara tájiribe almasýyna bolady», - dedi Memleket basshysy.
