QR Parlamenti Senatynyń Tóraǵasy Qasym-Jomart Toqaev Jastar jylyna bailanysty pikir bildirdi, dep habarlaidy "Ult aqparat".
«Qazaqstan jastary bilimdi, jan-jaqty damyǵan ári daryndy. Bizdiń elimizdiń bolashaǵy solardyń qolynda. Memleket basshysy ashqan Jastar jyly jas urpaqtyń ózekti máselelerin sheshýge kúshti serpin beredi, olardyń ózin-ózi tanytýǵa múmkindik týǵyzady», - dedi Q. Toqaev tvitter áleýmettik jelisindegi paraqshasynda.
Sonymen qatar, ol Qazaqstannyń ozyq oily jastary ǵylymda, IT-tehnologiiasynda, mádeniet, biznes pen sportta tamasha nátijelerge qol jetkizgenin atap ótti. Onyń paiymynsha, qabiletti, jigerli jastarǵa tiisti jaǵdai jasap, ynta-yqylasyn arttyrý kerek.
«Senatorlar Jastar jylyn qoldaýǵa baǵyttalǵan jumystarǵa qyzý kiristi. 7 aqpanda Senatta dóńgelek ústel otyrysy bolady, onda depýtattar men jastar ókilderi jas urpaqtyń bastamalaryn zań júzinde qoldaý múmkindikterin talqylaidy», - dep jazady Senat tóraǵasy.
