Memleket basshysy Qasym-Jomart Toqaev «Volonterlik – jastardyń áleýmettik lifti» atty Qazaqstan-Resei jastarynyń yntymaqtastyq forýmyna qatysty, dep habarlaidy "Ult aqparat" Aqordaǵa silteme jasap.
Forým aldynda Qazaqstan Prezidenti Qazaqstan men Resei jastarynyń STARTUP-jobalarynyń kórmesin aralady. Sondai-aq, Qostanai oblysy Jastarǵa qyzmet kórsetý ortalyǵynyń jumysymen tanysty.
Jiynǵa qatysýshylarǵa arnalǵan sózinde Qasym-Jomart Toqaev atalǵan forýmnyń bilim men tájiribe almasýǵa, pikirlester taýyp, ortaq maqsattar men josparlar jasaýǵa múmkindik beretinin atap ótti.
– Qazaqstan – jas ári jastardyń memleketi! Jastarymyz – damýdyń qozǵaýshy kúshi. Barlyq memlekettik organdardyń mindeti – jastardyń ózin ózi jaqsy tanytýyna jaǵdai jasaý jáne olardyń oń bastamalaryna qoldaý kórsetý, – dedi Memleket basshysy.
Qasym-Jomart Toqaev óz baiandamasynda elimizde eriktilerdiń qozǵalysyna airyqsha kóńil bólinetinin aitty.
– 2016 jyly eriktilerdiń mártebesin, quqyǵy men mindetterin jáne memlekettik qoldaý sharalaryn bekitetin «Volonterlik qyzmet týraly» zań qabyldadyq. 2017 jyly «EKSPO» halyqaralyq mamandandyrylǵan kórmesi jastardy jappai volonterlik qozǵalysqa tartý isin bastap berdi. Biyl Qazaqstandaǵy volonterlikti damytýdyń jańa kezeńi bolady, – dedi Memleket basshysy.
Qasym-Jomart Toqaev jastar jyly aiasynda ótkiziletin negizgi is-sharalarǵa toqtaldy.
– Jastardyń biznes-bastamalaryn damytýǵa arnalǵan «Jas kásipker» baǵdarlamasy ekonomikanyń negizgi sektorlaryndaǵy startaptarǵa qoldaý kórsetýge múmkindik beredi. Qyzmeti men bilimi joq jumysqa ornalaspaǵan jastardyń máselesi sheshilýde. Jumyspen qamtý, eń aldymen, eńbek tájiribesi joq jastar jóninde arnaiy baǵdarlama qabyldanýda. Bilikti jas mamandardy qoldaý kúsheie túsedi, – dedi Memleket basshysy.
Qazaqstan Prezidenti eriktiler qozǵalysynyń kóshbasshylaryn elimizdegi aýqymdy áleýmettik mindetterdi sheshý úshin belsendi atsalysýǵa shaqyrdy.
Sonymen qatar, Qasym-Jomart Toqaev Qazaqstan men Resei jastarynyń ekijaqty bailanystardy nyǵaitýǵa qosqan úlesine joǵary baǵa berdi.
– Eki el jastarynyń tikelei bailanystary – Qazaqstan men Resei arasyndaǵy strategiialyq seriktestiktiń, dostyqtyń jáne tatý kórshiliktiń baǵdaryn nyǵaitýdyń mańyzdy sharty. Elderimizdi ortaq tarih pen eń uzyn shekara ǵana emes, sonymen qatar, yntymaqtastyqtyń zor áleýeti de biriktiredi. Bul saiasatty jalǵastyra beremiz, – dedi Memleket basshysy.
Qasym-Jomart Toqaev eki eldiń eriktiler qozǵalysy arasyndaǵy seriktestikti yntalandyrýǵa baǵyttalǵan birqatar usynys aitty.
– Birinshiden, «Jyl volonteri» halyqaralyq syilyǵyn uiymdastyrýdy usynamyn. Syilyq úzdik volonterlik jobaǵa beriledi jáne kreativti ideialar men jobalar jasap júrgenderge jaqsy qoldaý bolady. Ekinshiden, Qazaqstan men Reseidiń volonterlik uiymdary kóshbasshylarynyń qatysýymen turaqty jumys isteitin Volonterlik keńes qurý múmkindigin talqylaýdy usynamyn. Bul ózara yntymaqtastyqty nyǵaitý úshin bizdiń áleýetimizdi kúsheite túsedi, – dedi Qazaqstan Prezidenti.
Sonymen qatar, forým barysynda Memleket basshysy jastar uiymdary kóshbasshylarynyń 2020 jyldy Volonterler jyly dep jariialap, tarihi-mádeni oryndarǵa birlesken arheologiialyq jáne izdeý jumystaryn júrgizý jónindegi bastamasyn qoldady.
