Qazaqstan úkimeti Aýǵanstan úkimetimen konstrýktivti iskerlik bailanystardy ornatýǵa daiyn. Bul týraly Memleket basshysy Qasym-Jomart Toqaev elimizge resmi saparmen kelgen Soltústik Makedoniianyń Syrtqy ister ministri Býiar Osmanimen kezdesýi kezinde aitty, dep habarlady Aqorda.
Kezdesýde Memleket basshysy Aýǵanstandaǵy ahýalǵa erekshe nazar aýdardy.
"Aýǵanstanǵa qatysty ustanymymyz aiqyn. Halyqaralyq qoǵamdastyqtyń osyndai betburystar kezinde Aýǵanstannan irgesin aýlaq salmai, atalǵan elge kómek berip, qoldaý kórsetýi qajet dep esepteimiz. Biz Aýǵanstannyń ýaqytsha jańa úkimetin inkliýzivti, barlyq etnikalyq toptar men qoǵamdyq-saiasi kúshterdiń múddesin qurmetteidi dep úmittenemiz", – dedi Prezident.
Sondai-aq Toqaev qazirgi Aýǵanstan úkimeti adam quqyqtaryn, áielder men balalardyń quqyqtaryn qorǵaý jónindegi mindettemelerin oryndap, halyqaralyq qaýymdastyqty jahandyq jáne aimaqtyq qaýipsizdik pen turaqtylyqqa qaýip tóndiretin terrorizmniń, zańsyz esirtki ainalymynyń taralýynan jáne basqa da qiyndyqtardan qorǵaý úshin naqty sharalar qabyldaitynyna úmit artty.
"Sonymen qatar Qazaqstan úkimeti Aýǵanstan úkimetimen konstrýktivti iskerlik bailanystardy, ásirese saýda jáne gýmanitarlyq yntymaqtastyq salalaryndaǵy qatynastardy ornatýǵa daiyn. Óitkeni bul salalar boiynsha eki el arasynda dástúrli tyǵyz bailanys bar", – dep málimdedi Prezident.
Qasym-Jomart Toqaev Aýǵanstanda turatyn qazaqstandyqtardyń qaýipsizdigin qamtamasyz etýdiń mańyzdy ekenine toqtaldy. Ol Býiar Osmanige Qazaqstan azamattary men etnikalyq qazaqtardy óz otanyna qaitarý jóninde, sondai-aq álemdik qaýymdastyqtyń halyqaralyq uiymdar qyzmetkerlerin, onyń ishinde BUU-nyń Aýǵanstanǵa kómek berý jónindegi missiiasyn evakýatsiialaý jumystaryna kómektesý jóninde qabyldaǵan sharalary týraly aitty.
