Foto: Akorda.kz
Qazaqstan Prezidenti men Majarstan Premer-ministri eki memlekettiń resmi delegatsiialarynyń qatysýymen keńeitilgen quramda kelissóz júrgizdi, dep habarlaidy "Ult aqparat" Aqordanyń baspasóz qyzmetine silteme jasap.
Qasym-Jomart Toqaev Qazaqstan men Majarstannyń tarihi tamyrlastyǵy jáne tyǵyz bailanystary búginde eki el arasyndaǵy yntymaqtastyqtyń tereńdei túsýine negiz bolǵanyn atap ótti.
– Qazaq pen majar – ejelden syilastyǵy jarasqan týystas, dostas halyqtar. Eki eldiń tili, salt-dástúri men mádenieti uqsas. Orta ǵasyrlarda Torǵai dalasynan Eýropaǵa qonys aýdarǵan qypshaq taipalarynyń urpaqtary búginde Majarstan aýmaǵynda ómir súrip jatyr. Biz muny maqtan tutamyz. Birlesken kúsh-jigerimizdiń arqasynda qazaq-majar yqpaldastyǵy barlyq salada qarqyndy damýda. Buǵan, qurmetti Premer-ministr myrza, Siz ólsheýsiz úles qosyp kelesiz. Biz baýyrlastyǵymyzdy, ózara tiimdi qarym-qatynasty odan ári tereńdetýge múddelimiz. Búgingi kelissózder ekijaqty strategiialyq seriktestikti odan ári damytýǵa tyń serpin beredi dep senemin, – dedi Prezident.
Qasym-Jomart Toqaev Qazaqstan men Majarstan arasynda ekijaqty yntymaqtastyqty odan ári damytý úshin jaqsy institýtsionaldy negiz bar dep sanaidy. Memleket basshysynyń pikirinshe, Ekonomikalyq yntymaqtastyq jónindegi úkimetaralyq komissiia men Iskerlik keńes eki eldiń saýda qatynastaryn damytýda belsendi ról atqarýy kerek.
– Geosaiasi shielenisterge qaramastan, byltyr taýar ainalymy 20 paiyzdan astam ósti. Taiaý bolashaqta bul kórsetkishti 1 milliard dollarǵa deiin jetkizýge tolyq múmkindigimiz bar ekenine senimdimin, – dedi Qazaqstan Prezidenti.
Taraptar energetika, kólik, logistika, metallýrgiia, óńdeý ónerkásibi, aýyl sharýashylyǵy, farmatsevtika, tamaq ónerkásibi jáne týrizm siiaqty salalardaǵy bailanystardy damytýǵa ózara múddeli ekenin bildirdi.
Sonymen qatar kelissóz barysynda eki eldiń zań shyǵarýshy organdarynda jumys isteitin dostyq toptary arqyly parlamentaralyq bailanysty nyǵaitýdyń mańyzdylyǵy aityldy. Sondai-aq BUU, EQYU, TMU jáne túrli halyqaralyq platformalar aiasyndaǵy ózara yqpaldastyq perspektivalary qarastyryldy.
Budan bólek, Memleket basshysy eki eldiń gýmanitarlyq bailanystaryn nyǵaitý máselesine de toqtaldy. Búgin Astana kósheleriniń birine majar ultynyń kórnekti aqyny Shandor Petefidiń esimi beriledi. Bul – Qazaqstan men Majarstan arasyndaǵy tyǵyz dostyq qatynastardyń taǵy bir aiqyn dáleli.
Óz kezeginde Viktor Orban qurmetpen qarsy alǵany úshin Qasym-Jomart Toqaevqa jáne baýyrlas Qazaqstan halqyna alǵys aitty.
– Qurmetti Prezident myrza! Biz Qazaqstanǵa árqashan erekshe qýanyshpen kelemiz. Biz munda sońǵy ret pandemiiaǵa deiin bolǵan edik. Sol kezdiń ózinde ekijaqty qarym-qatynasymyz óte tabysty damydy. Biraq koronavirýs barlyq bailanystarymyzdyń qarqynyn tejedi. Biz búgin ózara yqpaldastyǵymyzǵa tyń serpin berý úshin keldik. Orta Aziia aimaǵynda bizdi Qazaqstanmen ǵasyrlar boiǵy tarihymyz bailanystyrady. Sondyqtan sizderdiń árbir jetistikterińizge qýanamyz. Qazaqstan – tabysty damyp kele jatqan ǵajap el. Men árqashan Qazaqstannan úlken ásermen qaitamyn, – dedi Majarstan Premer-ministri.
Kelissóz qorytyndysy boiynsha bilim salasyndaǵy ózara túsinistik týraly memorandýmǵa qol qoiyldy.
