Foto: Akorda.kz
Memleket basshysy Qasym-Jomart Toqaevtyń tóraǵalyǵymen Qazaqstan Respýblikasy Qaýipsizdik Keńesiniń otyrysy ótti, dep habarlaidy "Ult aqparat" Aqordanyń baspasóz qyzmetine silteme jasap.
Jiynda azyq-túlik qaýipsizdigin qamtamasyz etý jónindegi problemalar qarastyryldy. Otyrys barysynda eldiń azyq-túlik táýelsizdigin nyǵaitýǵa qatysty birqatar másele talqylandy.
Jiynnyń kún tártibine sáikes Premer-Ministrdiń orynbasary Serik Jumanǵarin sóz sóiledi. Sondai-aq qabyldanǵan jáne josparlanǵan sharalar týraly birqatar ýákiletti memlekettik organ basshylary esep berdi.
Talqylaý nátijesi boiynsha Memleket basshysy halyqty qoljetimdi ári sapaly azyq-túlikpen qamtamasyz etý máselesin negizgi basymdyq retinde atap ótti.
Azyq-túlik taýarlaryn óndirý men satýdyń barlyq satysynda baǵa belgileýdiń ashyq bolýy, ónimsiz deldaldarmen kúres júrgizýdiń mańyzdy ekenine nazar aýdaryldy.
Demografiialyq úrdisterdi eskere otyryp, azyq-túliktiń fizikalyq turǵyda qoljetimdiliginiń perspektivalary eńbek ónimdiliginiń ósýine, aýyl sharýashylyǵy men otandyq agrarlyq ǵylymnyń jańǵyrýyna tikelei bailanysty ekeni atap ótildi.
Jerdi tozýdan qorǵaý sharalaryn jandandyrý ózekti másele bolyp otyr. Sondai-aq aýyl sharýashylyǵy tehnikasy parkin jańartý protsesin júieli túrde uiymdastyrý jáne jergilikti jaǵdaiǵa beiimdelgen menshikti tuqym qoryn qurý úshin jańa tásilder qajet.
Budan bólek, aýyl sharýashylyǵy salasyna kórsetiletin memlekettik qoldaý sharalaryna erekshe nazar aýdaryldy.
– Sýbsidiialaý agroónerkásip keshenindegi ónimdilikti arttyrýǵa yqpal etýge tiis. Sýbsidiiany bólý kezinde óńirlik erekshelikterdi, egis alqaptarynyń kólemin jáne aýyl sharýashylyǵy daqyldaryn tańdaýdy eskergen jón, – dedi Qasym-Jomart Toqaev.
Sonymen qatar Prezident azyq-túlik ónimderin óndirýmen ainalysatyn sharýalar men kásiporyndarǵa memlekettik qoldaý kórsetýdi talap etetin ekonomikalyq koniýnktýrany ózgertýge jedel nazar aýdarý qajettigin aitty.
Aýyl sharýashylyǵy óndirisine infraqurylym turǵysynan qoldaý kórsetý isi (aýylda jumys ornyn ashý, fitosanitariialyq jáne veterinariialyq qorǵaý júiesiniń tiimdiligin arttyrý) arnaiy másele retinde qarastyryldy.
Bul rette quqyq qorǵaý organdaryna aýyl sharýashylyǵy maqsatyna arnalǵan sýbsidiialar men jerlerdi bólý kezinde sybailas jemqorlyqqa qarsy kúres jumystaryn jalǵastyrý tapsyryldy.
Memleket basshysy jiyn sońynda Úkimet pen ýákiletti organdarǵa azyq-túlik táýelsizdigin nyǵaitý, azyq-túliktiń ekonomikalyq turǵyda qoljetimdi bolýyn arttyrý jáne otandyq agroónerkásip kesheniniń áleýetin anaǵurlym tolyq iske asyrý jóninde naqty tapsyrmalar berdi.
