Foto: Akorda.kz
Memleket basshysy Qaraǵandy oblysynyń ákimi Ermaǵanbet Bólekpaevty qabyldady, - dep habarlaidy "Ult aqparat" Aqordaǵa silteme jasap.
Prezidentke Qaraǵandy oblysynyń 2023 jylǵy áleýmettik-ekonomikalyq damý qorytyndysy týraly esep berildi.
Qasym-Jomart Toqaevqa byltyr 11 aidyń ishinde óńirdegi ónerkásip óniminiń kólemi 3,1 trillion teńgeni quraǵany jóninde baiandaldy. Negizgi kapitalǵa salynǵan investitsiia 16,3 paiyzǵa artyp, 727 milliard teńgege jetken.
Oblys ákiminiń aitýynsha, óńdeý ónerkásibi salalarynda, atap aitqanda, mashina jasaý isinde 45 paiyz, jeńil ónerkásipte 23,9 paiyz, farmatsevtikada 20 paiyz ósimge qol jetkizilgen. Sonymen qatar qaǵaz ónerkásibinde, qurylys indýstriiasy men qara metallýrgiiada ósim baiqalady.
Shaǵyn jáne orta biznes salasynda 100 myńnan astam kompaniia qyzmet etedi jáne bul baǵytta óńirdegi belsendi halyqtyń 45 paiyzy jumys isteidi. Kásipkerler úshin bólshek salyqtyń mólsheri 4 paiyzdan 2 paiyzǵa deiin tómendetildi. Biyl jalpy óńirlik ónimdegi shaǵyn jáne orta biznestiń úlesin 19 paiyzdan 25 paiyzǵa arttyrý josparlanyp otyr.
Oblys ákiminiń aitýynsha, ekonomikanyń barlyq salasynda 25 myńnan astam jumys orny ashylyp, jumyssyzdyq deńgeii 4,1 paiyzǵa, kedeilik deńgeii 2,7 paiyzǵa deiin tómendegen. Al halyqtyń naqty tabysy 4,7 paiyzǵa kóbeigen.
Budan bólek, Prezidentke jylytý maýsymynyń barysy, Qarmet kásipornyndaǵy qazirgi jaǵdai týraly baiandaldy. Memleket basshysyna jańa investordyń óndiristi turaqtandyrý jáne onyń kólemin arttyrý baǵytynda qabyldap jatqan sharalary, sondai-aq óndiristi jańǵyrtý jáne kompaniia jumysshylarynyń eńbek qaýipsizdigin qamtamasyz etý jospary jóninde málimet berildi.
Áleýmettik sala boiynsha aýyldyq jerlerde 92 densaýlyq saqtaý nysanynyń qurylysy, eki aýdanaralyq aýrýhanany jańǵyrtý jumystary bastalǵan. Biyl «Jaily mektep» jobasy aiasynda óńirde 7100 oryndyq 10 mektep paidalanýǵa berilmek.
Sonymen birge Ermaǵanbet Bólekpaev áleýmettik salanyń jai-kúii, «Aýyl – el besigi» jáne «Aýyl amanaty» jobalarynyń iske asyrylýy týraly da baiandady.
Kezdesý sońynda Qasym-Jomart Toqaev oblysty odan ári damytý jáne turǵyndardyń ál-aýqatyn jaqsartý jóninde birqatar tapsyrma berdi. Sondai-aq Memleket basshysy Qarmet kompaniiasyna qarasty nysandardaǵy jaǵdaidy erekshe baqylaýǵa alý qajet ekenin atap ótti.
