Qazaqstan Prezidenti Qasym-Jomart Toqaev telekópir rejiminde Qaraǵandy oblysynyń Jáirem kentinde jańadan ashylǵan ken baiytý kesheniniń jumysyn resmi túrde iske qosty, dep habarlaidy "Ult aqparat" Aqordanyń resmi saityna silteme jasap.
Ken baiytý fabrikasynyń qurylysynda 2500-ge jýyq adam jumys istedi. Jáirem kenti úshin jańa jobanyń iske qosylýy jańa ómir men damýdyń zor keleshegine jol ashady. Ken baiytý kesheni Qazaqstanda myrysh pen qorǵasyn kontsentrattaryn shyǵaratyn eń iri kásiporyn bolady. Óndiriste 400 adam jumyspen qamtylady.
Qaraǵandy oblysynyń ákimi Jeńis Qasymbek Memleket basshysyna aimaq úshin atalǵan jobanyń mańyzy zor ekenin aitty. Jańa fabrika shyǵarylatyn ónim túrleri kóbeiedi jáne óndiris kólemi 2,5 ese artyp, 5 million tonnaǵa deiin jetedi. Sondai-aq óńdelgen ónimniń eksporty ulǵaiyp, salyq túsimi 1,5 milliard teńgege kóbeiedi. Joba bastalǵaly beri investorǵa barynsha qoldaý kórsetildi. Júieli júrgizilgen jumystyń nátijesinde koronavirýs indetine qaramastan, joba belgilengen merzim ishinde aiaqtaldy.
Prezidentke qazirgi tańda Qaraǵandy oblysynda 2 trillion teńgeden asatyn qarajatqa 50 iri investitsiialyq joba iske asyrylyp otyrǵany jóninde baiandaldy. Biyl 14 joba iske qosylyp, aimaqtyń ónerkásip kásiporyndarynyń infraqurylymyna tartylatyn investitsiia kólemi 230 milliard teńgeni quraidy.
«Qazmyrysh» JShS bas direktory Aleksandr Hmelev Qasym-Jomart Toqaevqa fabrikanyń qurylysy 3 jylda aiaqtalǵanyn jáne koronavirýs indeti júktelgen mindetti iske asyrýǵa kedergi bolmaǵanyn aitty. Onyń pikirinshe, baiytý fabrikasynyń iske qosylýy Jáiremdi ǵana emes, tutastai Qaraǵandy oblysyn damytýdyń jańa kezeńi bolmaq. Munda jylyna 5 million tonna ken óńdeledi. Bul kásiporynnyń keminde 15 jyl jumys isteýine múmkindik beredi.
Sonymen qatar «Qazmyrysh» kompaniiasy kenttiń damýyna 5 milliard teńgege jýyq qarajat quidy. Jergilikti aýrýhanaǵa zamanaýi jabdyqtar satyp alynyp, quzyretterdi damytý ortalyǵy quryldy jáne kommýnaldyq salany jańǵyrtý men damytýǵa jyl saiyn qarjy bólinedi.
Jáiremdegi ken baiytý kesheniniń tseh basshysy Erkin Shaihin Memleket basshysyna qoldaý kórsetkeni úshin alǵys bildirip, kenttiń jandanǵanyn jáne ondaǵy oń ózgerister týraly, sondai-aq jańa fabrikanyń iske qosylýynan jergilikti turǵyndar zor úmit kútetinin aitty.
Is-shara sońynda Prezident kásiporynnyń eńbek ujymyna jáne osy iri jobany iske asyrýǵa atsalysqan barsha azamattarǵa rizashylyǵyn bildirip, tabys tiledi.
