Memleket basshysy Qasym-Jomart Toqaev «Qazaqstan» telearnasyna bergen suhbatynda Ujymdyq qaýipsizdik sharty uiymynyń (UQShU) kúshterin kómekke jiberýge Kreml tarapynan eshqandai alǵysharttyń bolmaǵanyn málimdedi, - dep habarlaidy Tengrinews.kz tilshisi.
"Ókinbeimin. Bul - eshqandai da ókindiretin sheshim emes. Kerisinshe durys sheshim boldy dep oilaimyn. Óitkeni, qarýly qaraqshylar Almatyny qiratyp, ózge qalalarǵa qaýip tóndirdi. Osy qarýly kontingent bolmasa, lańkester basqa da qalalardy basyp alar edi. Qarýly shaiqastar Taldyqorǵanda, Tarazda, Shymkentte, Qyzylordada oryn aldy. Elordada lańkesterdiń daiyndyq jumystary baiqaldy, olar, tipti, Aqordaǵa shabýyl jasaýǵa daiyn boldy", - dedi Prezident Qazaqstan ulttyq telearnasyna bergen suhbatynda.
Toqaev keibir bedeldi sarapshylar aitýynsha, lańkester Qazaqstannyń basty eki qalasyn basyp alýdy josparlaǵanyn aitty. "Bul Siriiadaǵy stsenariige uqsas jospar" dedi. Sol elde lańkester Damask pen Rakkany basyp alýǵa árekettengenin de aitty.
"Ujymdyq qaýipsizdik shart uiymynyń áskerleri bizdiń elde bir de bir oq atqan joq. Ony ashyq aitý kerek. Olar tek negizgi strategiialyq nysandardy kúzetip turdy. Osy kezde bizdiń kúshtik qurylymdar iske kirisip, qarýly lańkesterge tosqaýyl qoidy. Aramyzda tek tyǵyz bailanys pen úilesim boldy.
Al endi "Pýtinge qaryz bop qaldyq" degenge kelsek, bul - bos áńgime. Ony doǵarý kerek. Birinshiden, Ujymdyq qaýipsizdik týraly shart uiymynyń kontingenti - Vladimir Pýtinniń nemese Reseidiń jeke áskeri emes. Bul uiymnyń áskeri quramy oǵan múshe elderdiń bárine ortaq. Onda Reseiden bólek, Belarýs, Armeniia, Tájikstan jáne Qyrǵyzstannyń áskeri bólimderi bar. Qazaqstan da - osy uiymnyń tolyqqandy múshesi ári negizin qalaýshysy. Sondyqtan, bári - zańdy, qisyndy.
Reseige kelsek, bul alpaýyt el óziniń geosaiasi múddesin de qorǵady. Qazaqstannyń turaqtylyǵy Reseige óte qajet. Muny durys túsinýimiz kerek. Qazaqstan men Resei - strategiialyq seriktester. Aramyzda shynaiy dostyq pen ózara senim bolýy kerek. Basqa saiasat ustansaq, eki eldiń strategiialyq múddesine nuqsan keltiremiz. Jalpy, biz eshkimge eshteńe de qaryz emespiz. Qazaqstan - egemen memleket. Sondyqtan saiasatymyz da derbes", - dedi Prezident.
